قائیمقامی سلێمانی رایدەگەیەنێت" هەموو ئەو دوكان و شوێنانەی بەپێی رێنماییە نوێكانی ژوری ئۆراسیۆنی خۆپارێزی كراونەتەوە پێویستە پابەندی مەرجەكانی كاركردن و رێنماییە تەندروستییەكان بن، بە پێچەوانەوە روبەڕوی رێكاریی یاسایی توند دەكرێنەوە".
ئەمڕۆ چوارشەممە 8-4-2020 ئاوات محەمەد قائیمقامی سلێمانی لەگەڵ لیژنە هاوبەشەكانی قائیمقامیەت كۆبوەوە راسپاردن كە سەردانیان بۆ ئەو شوێنانەی بەپێی رێنماییە نوێكانی ژوری ئۆپراسیۆنی خۆپاراستن لە ڤایرۆسی كۆرۆنا كراونەتەوە زیاتر بكەن و پشكنینەكانیان لەڕوی تەندروستی، ڤێتێرنەری و نرخەوە ئەنجام بدەن.
وتیشی" لەكاتی هەبونی سەرپێچی لە بڕیار و رێنماییەكانی ژوری خۆپارێری لە ڤایرۆسی كۆرۆنا شوێنەكە و خاوەنەكەشی روبەڕوی رێكاریی یاسایی بكەنەوە".
رونیكردەوە: ئامانج لە كاری لیژنە هاوبەشەكان سزادانی خاوەن شوێن و شكاندنی بازاڕیان نیە، بەڵكو لیژنەكان بەرپرسن لە پاراستنی تەندروستی هاوڵاتیان هەروەها رێگری لە دروست بوونی قەرەباڵغی و بڵاوبونەوەی ڤایرۆسی كۆرۆنا دەكەن.
قائیمقامی سلێمانی وتیشی" هێشتا مەترسییه گەورەكەی بڵاوبونەوەی ڤایرۆسی كۆرۆنا نەڕەویوەتەوە كە پێویستە هەموومان زیاتر خۆمان بپارێزین تا رێگربین لە بڵابونەوەی".
لە كۆبونەوەی لەگەڵ لیژنە هاوبەشەكانی قائیمقامیەت، ئاوات محەمەد، قائیمقامی سلێمانی ئاماژەی بۆ ئەوەكرد" لیژنە هاوبەشەكان ئەركێكی دینی و مرۆڤایەتی و نیشتمانییان لەسەرشانە و پێویستە بە هەموومان وەك یەكتیم لەگەڵ فەرمانگە خزمەتگوزارییەكانی دیكە كاربكەین بۆ دورخستنەوەی شارەكەمان و وڵاتەكەمان لە مەترسی بڵاونەوەی ڤایرۆسی كۆرۆنا".