وەفدی باڵای حکومەتی هەرێمی کوردستان بە سەرۆکایەتی قوباد تاڵەبانی جێگری سەرۆکی ئەنجومەنی وەزیران ئەمڕۆ هەینی لە بەغدا لە گەڵ دەستەی سیاسی ڕەوتی سەدر کۆبووەوە و جەخت دەکەنەوە لەسەر چارەسەرکردنی یاسایی و دەستورییانەی کێشەکان کە لە بەرژەوەندی هەمواندا بێت.

نەسار روبەیعی سەرۆکی دەستە‌ی سیاسی رەوتی سەدر، جەختیکردەوە سامانی عێراق هی هەموو عێراقییەکانە بە هەرێمی کوردستانیشەوە، هەروەها پشتیوانی خۆیان دەربڕی بۆ چارەسەرکردنی یاسایی و دەستورییانەی کێشەکان کە لە بەرژەوەندی هەموواندا بێت و ببێتەهۆی بەدیهێنانی دادپەروەری. 

هاوکات لای خۆشیەوە قوباد تاڵەبانی جێگری سەرۆکی ئەنجومەنی وەزیران جەختیکردەوە مەبەستیانە پەیوەندییەکانی هەرێم و حکومەتی فیدرال بەهێزتر بکەن و چارەسەری دەستوریی بۆ پرسە داراییە هەڵپەسێردراوەکان بدۆزنەوە، هەروەها ئامادەیی هەرێمی کوردستانی پیشاندا بۆ پابەندبوون بە ناوەڕۆکی یاسای پڕکردنەوەی کورتهێنانی دارایی كە لە ئەنجومەنی نوێنەران دەرچووە.

لەكۆتایی کۆبونەوەکەدا هەردوولا کۆک بوون لەسەر جێبەجێکردنی ماددە‌كانی یاسای پڕکردنەوەی کورتهێنانی دارایی لە‌پێناو چارە‌سە‌ركردنی گرفتە‌ داراییە‌كان.