نرخی بەنزین و سووتەمەنی بەشێوەیەکی بەردەوام بەرزدەبێتەوە، بەشێكیش لەبەنزینخانەكان بەهۆی خراپی كوالێتی بەنزینەكانیان دەبنە هۆی تێكچوونی ئۆتۆمبێل و سووتانی  فیتپەمپی ئۆتۆمبیلەکان.

جەنگی مەجید، سەرۆكی ئەنجوومەنی بەنزینخانەكانی هەولێر ڕاگەیاند، "هۆكاری گران بوونی نرخی بەنزین بەهۆی گرانبوونی نرخی نەوت لەجیهان و شەڕی ڕوسیا و ئۆكراینا و كێشە سیاسیەكان و ئەوروپاوەیە، هەروەها لەتوركیا و ئێرانیش نرخی گاز و بەنزین گرانبووە".

باسی ئەوەشیکرد، لەهیچ شوێنێك نیە نرخی سووتەمەنی هەرزان بێت، بۆیە بەگران دێت و بەگران دەفرۆشرێت، تەنانەت توركیا لێرە گاز دەكڕێت و هاوردەی دەكات بۆخۆی.

لەبارەی خراپی كوالێتی بەنزین باسی لەوەكرد، ڕەنگە لە٣٠٪ بەنزینخانەكان ئەو بەنزینە بەكاربێنن، كە لەماددەی MTBو نەوت درووست دەكرێت، ئەم جۆرە بەنزینەش تەنها بۆ وەرزی سەرما و فێنك دەبێت، بۆ وەرزی گەرما نابێت، چونكە پاڵەپەستۆی هەوا بەرزدەبێتەوە و هەوا درووست دەبێت وادەكات فیول پەمپ كار نەكات.