وەزارەتی نەوتی عێراق رایدەگەیەنێت "سێ كۆمپانیای نەوتی نێودەوڵەتی بەڵێنیان داوە پڕۆژەی نوێ لە هەرێمی كوردستان پێشكەش نەكەن".
وەزارەتی نەوتی عێراق ئەمڕۆ ٤-٧-٢٠٢٢ لە ڕاگەیەنراوێكدا رایگەیاندووە "بە لەبەرچاوگرتنی ئەو پرسیارە زۆرانەی ئاڕاستەی وەزارەتی نەوت كراوە لە میدیا نێودەوڵەتیی و ناوخۆییەكانەوە سەبارەت بە هەڵوێستی ئەو كۆمپانیا نەوتییانەی لە هەرێمی كوردستان كاردەكەن لەبارەی بڕیارەكەی دادگای فیدراڵی".
هەروەها ئاماژەی بەوەكردووە "وەزارەتمان پشتڕاستی دەكاتەوە كە كۆمپانیا دیارەكانی شلومبێرگەر، بیگ هیوز و هالیبێرتۆن پشتڕاستیان كردۆتەوە كە پڕۆژەی نوێ لە هەرێمی كوردستان پێشكەش ناكەن وەك پابەندبوون بە بڕیاری دادگای فیدراڵی و ڕێنماییەكانی لیژنەی بەڕێوەبەرایەتی كە لە وەزارەتی نەوت پێكهێنراوە".
وەزارەتی نەوت وتویەتی "ئەو كۆمپانیایانە ئێستا لە پرۆسەی تەسفیەكردن و داخستنی تەندەرین و گرێبەستە هەنووكەییەكاندان، بەڵێننامەیان پڕكردووەتەوە كە خاوەنی هیچ قەوارەیەكی بازرگانی یاخود كۆمپانیایەكی دیكە نین لە هەرێمی كوردستاندا".