سەرجەم فراکسیۆنە کوردیەکانی پەرلەمانی عێراق، کۆمەڵ، یەکگرتوو، نەوەی نوێ، یەکێتی بە توندی دژی ئەو هەوڵە دەوەستنەوە کە پارتی دەیەوێت هەڵبژاردنی پەرلەمانی کوردستان کە بڕیارە ١٠ ی حوزەیران سازبکرێت، دوابخات و دەڵێن" وادەی هەڵبژاردن بۆتە " گاڵتەجاڕی".

لە بەیاننامەیەکدا کە واژووی سەرۆکی هەر چوار لیستی کوردی، هەرێم کەمال ئاغا و سروە عەبدولواحید و سۆران عومەر و جەمال کۆچەری لەسەرە، بەتوندی رەتیدەکەنەوە هەڵبژاردن دوابخرێت و دەڵێن" سێ جار هەڵبژاردن دواخراوە، ناکرێت لەسەر ئارەزوو و بەرژوەندیەکانی حزبێک جارێکی تر دوابخرێت".

هاتووشە" ناکرێت بۆ هیچ حزبێک دەسەلآتی ئەمنی و سەربازی خۆی بسەپێنێت و بیکاتە ئەمری واقیع و یاخی بێت لە یاسا و بڕیارەکان".

ئەو بەیاننامەیە لە کاتێکدا کە سەرۆکی هەرێم هەموو هەوڵەکانی چر کردۆتەوە ئەجێندانی پارتی جێبەجێبکات و هەڵبژاردن دوا بخات بۆ مانگی تشرینی یەکەمی ٢٠٢٤.