ئەندامی پەرلەمانی عێراق لە فراكسیۆنی گۆڕان دەڵێت پاش پەككەوتنی پەرلەمانی كوردستان كێشەی هاوڵاتیانی هەرێم لە پەرلەمانی عێراق گفتوگۆی لەسەر دەكەین.

هۆشیار عەبدوڵا هەروەها رایگەیاند: سەرۆکایەتی پەرلەمان و زوربەی کوتلەکان پشتیوانی و دەستخوشیان لێکردوین بۆ خستنەروی کێشەی فەمانبەرانی هەرێم و بەڵێنی هەموو پشتیوانیەکیشیان داوە .

هۆشیار عەبدوڵا ئەوەشی ڕاگەیاند چەندین پێشنیاری گرنگ و سەرنج راکێش بۆ کارکردنی پەرلەمان بە ئاراستەی چارەسەری موچە خرایە روو و کامیان بە شیاو بزانین کار بۆ جێبەجێکردنی ئەکەین .

دەربارەی ئەو هێرشەی لە چەند میدیایەکی حزبیەوە کراوەتە سەری بەوەی کیشەکانی ناوخۆ دەباتە دەرەوەی هەرێم؛ هوشیار عەبدوڵا وتی:  هیچ سڵ ناکەمەوە لەوەی ئیدی کیشەی موچەی فرمانبەران کوێ پێویست بێت پێی بگەینین و پەرلەمانی عێراقیش دوای داخستنی دەرگای پەرلەمانی کوردستان باشترین جێگەیە بەو پێیەی نوێنەری هەموو پارێزکاکانی تێدایە و پاشان سڵ لەچی بکەینەوە داوای ماف و موچەی خەڵکمان لە بەغداد کردوە خۆ داوامان نەکردوە دەبابە بیهنینە سەر هەرێم .

هوشیار عەبدوڵا ئەوەشی راگەیاند کە لەدانیشتنەکەی پەرلەماندا وەک خوی راستیەکانی دەربارەی ژیانی خەڵک و فەرمانبەران و مەترسیەکانی سەر سێکتەری پەروەردە و خوێندن و تەندروستی و نەبونی شەفافیەتی نەوت و پەکخستنی پەرلەمانی کوردستان و بێزاری خەڵکی هەرێمی خستۆتە بەردەم پەرلەمان و رایگشتی عێراقی .

ئەو پەرلەمانتارەی گۆران کە لەسەر پشکی سلێمانی ئەندامی ئەنجومەنی نوێنەرانە ئەوەشی وت بە وردی چاودێری هەنگاوی لیژنەکان دەکەین کە سەرۆکایەتی پەرلەمان دەیانخاتە گەڕ و هیچ ئەولەویەتێکمان نابێت لەسەروی کێشەی موچەی فەرمانبەران .