ژیلەمۆ عەبدولقادر، بەڕێوەبەری بەرەنگاربوونەوەی توندوتیژی دژی ژنان، لە وتاری ئەم هەفتەیەیدا باس لە ژن و مێردێک دەکات کە پیاوەکە کەوتووەتە خۆشەویستی کچێکی دیکەوە.

ژیلەمۆ نوسیویەتی "ژنێك دەستی منداڵە بچووكەكەی گرتبوو، بە پەلە خۆی بە بەڕێوەبەرایەتییەكەماندا كرد و هاواری كرد فریام بكەون مێردەكەم هەڕەشەم لێدەكات، بەدوامدا دەگەڕێت و بمدۆزێتەوە دەمكوژێ‌، خێرا چارەیەكم لێ بكەن،
دوای ئەوەی ناونیشان و ژمارە تەلەفۆنی مێردەكەی وەرگیرا، دەستبەجێ‌ پەیوەندیی پێوەكرا كە سەردانی بەڕێوەبەرایەتییەكەمان بكات، بۆ ئەوەی بزانین كێشەكەیان چییە. زۆری نەبرد پیاوەكە هات و لێمان پرسی بۆچی هەڕەشەی كوشتن لە ژنەكەت دەكەی؟ داماوە چی كردووە؟ پیاوەكە بە تووڕەییەوە گوتی ئەگەر دەزانن چ هەرایەكی ناوەتەوە و چۆن ژیانی منی خستووەتە مەترسییەوە، ئەوە قەت دەستم ناگرن لەوەی هەرچییەكی بەسەربێنم".

هەر لەو وتارەدا ژیلەمۆ بەردەوام دەبێت لە گێڕانەوەی چیرۆکەکە و نوسیویەتی "ژنەكە هەر دەیگوت من هیچ سكاڵایەكم نییە، تەنیا دەمەوێ‌ بەڵێننامەیەكی پێ‌ پڕبكەنەوە و ژیانی خۆم و منداڵەكەم پارێزراو بێت،لە پیاوەكەمان پرسی كێشەت لەگەڵ ژنەكەت چییە؟ گوتی من و ئەو ژنە كێشەیەكی ئەوتۆمان نەبوو، كاتی خۆی بێنەوبەردەیەكی زۆرم كرد هەتا كەسوكاری رازی بوون بۆ یەك ببین. ئێستاش هیچ كێشەمان نییە، بەڵام من كچێكم خۆشدەوێ‌ و دەمەوێ‌ بیخوازم. هاوژینەكەم بە پەیوەندییەكەی زانی، منیش نەمتوانی نكۆڵی لێبكەم و گوتم بەڵێ‌ راستە، پەیوەندیم هەیە و دەمەوێ‌ بیخوازم، ئەویش یەكسەر هەڕەشەی لێكردم و گوتی سكاڵاتان لەسەر تۆمار دەكەم، منیش بێمنەتم كرد و گوتم ئارەزووی خۆتە، من ناتوام دەست لە خۆشەویستەكەم هەڵبگرم، بەڵام ئەو سكاڵای تۆمار نەكرد، یەكسەر تۆرا و چووەوە ماڵی باوكی. ماوەیەكی زۆر لەوێ‌ مایەوە، ئەو ماوەیە هیچ پەیوەندیمان نەبوو."

ئەو پیاوە وتوویەتی تاوەكوو رۆژێكیان پەیوەندیی پێوەكردم و گوتی دەگەڕێمەوە لات، منیش گوتم بەخێربێیتەوە، بەڵام لەوە دڵنیابە من واز لەو كچە ناهێنم. هەرچەندە دایكی ئامۆژگاری كرد كە نەگەڕێتەوە و لێم جیاببێتەوە، بەڵام ئەو سوور بوو لەسەر ئەوەی بگەڕێتەوە. خۆزگە رێگەم نەدابا بگەڕێتەوە، خەریك بوو بە كوشتنم بدات. بەبێ‌ ئەوەی ئاگام لێ‌ بێت، چووەتە سەر ماڵی باوكی ئەو كچە و هەڕەشەی لە كچەكە كردووە كە واز لە من بهێنێ‌، لە كاتێكدا كەسوكاری كچەكە كەسیان بەو پەیوەندییەیان نەزانیوە، ئێستا كەسوكاری كچەكە بەدوامدا دەگەڕێن و دڵنیام بمدۆزنەوە دەمكوژن.
پیاوەکە وتویەتی "ئێستا لەبەرچاوی ئێوە بەڵێن دەدەم كە لە ئێستاوە هیچ پەیوەندییەكم بەو ژنەوە نەماوە، نەك هەر هەڕەشەی لێناكەم، بەڵكو بەرلەوەی بێمە لای ئێوە لەلای پارێزەرێك و بە ئامادەبوونی دوو شایەت تەڵاقم داوە. ئێستا لە خەمی ئەوەدام كە چۆن كێشەكەی خۆم چارەسەر بكەم"

ژیلەمۆ دەڵێت ئەو ژن و پیاوە هەردووكیان رێگەیەكی هەڵەیان هەڵبژاردووە. پیاوەكە مادام بەنیازی هێنانی ئەو كچە بووە، دەبووایە بەرلەوەی ژنەكەی بە پەیوەندییەكەی بزانێت، پێی بڵێت و هۆكاری پەیوەندییەكە و هێنانی ئەو كچەی بۆ روونبكاتەوە، هەروەها ئافرەتەكەش كاتێك بە پەیوەندییەكەی زانیوە، نەدەبووایە هەڵبچێ‌ و دەیتوانی پەنا بۆ یاسا ببات، یان قەناعەت بە پیاوەكەی بهێنێ‌ كە واز لەو كچە بهێنێ‌. ئەگەر هاوژینەكەی هەر سووربووایە لەسەر هێنانی كچەكە، ئەوە دەیتوانی پەنا بۆ یاسا ببات و لە حاڵەتی ئەوەی هاوژینەكەی كچەكەی خواستبا سكاڵای لەسەر تۆمار كردبا، چونكە بەپێی یاسا هێنانی ژنی دووەم زۆر سنووردار كراوە و ئەگەر پیاوەكە بیانوویەكی قەناعەتپێكەری نەبێ، ئەوا لەسەر ئەو كارەی دەخرێتە زیندانەوە.