ئاوات محه‌مه‌د، قائیمقامی سلێمانی ئەمڕۆ لە کۆنگرەیەکی ڕۆژنامەوانیدا ئاماری كارو چالاكییه‌كانی ده‌ رۆژی یه‌كه‌می مانگی ره‌مه‌زانی ئاشكراكرد و رایگەیاند" لە ده‌رۆژی یه‌كه‌می مانگی ره‌مه‌زاندا زیاتر له‌ (2.814) سه‌ردانیان ئه‌نجامداوه‌، له‌و ژماره‌ (211) پسوڵه‌ی سه‌رپێچیان له‌ شوێنه‌كان تۆماركردوه‌ و (145) ئاگادارییان داوه‌ته‌ خاوه‌ن شوێنه‌كان كه‌ پابه‌ندی مه‌رج و رێنماییه‌كانی كاركردن بن و جارێكی دیكه‌ سه‌رپێچی نه‌كه‌نه‌وه‌، به‌پێچه‌وانه‌وه‌ شوێنه‌كه‌یان روبه‌ڕوی داخستن و رێكاره‌ یاساییه‌كان ده‌كرێته‌وه‌".

رونیكرده‌وه‌، به‌هۆی جێبه‌جێ نه‌كردنی ‌مه‌رجه‌كانی ته‌ندروستی و ڤێتێرنه‌ری و رێنماییه‌كانی دیكه‌ی كاركردن وه‌ هه‌روه‌ها پابه‌ندنه‌بون به‌رێكاره‌كانی خۆپارێزی لیژنه‌ هاوبه‌شه‌كانی قائیمقامیه‌تی سلێمانی (34) شوێنیان داخستوە و (5) شوێنیشیان داوەتە دادگا.

ئاماژه‌ی بەوەشکرد، له‌ئه‌نجامی پشكنینه‌ به‌رده‌وامیه‌كانی لیژنه‌ هاوبه‌شه‌كان بۆ ئه‌و كاڵاوشمه‌ك و خوارده‌مه‌نیانه‌ی رۆژانه‌ هاوڵاتیان به‌كاریده‌به‌ن، توانیویانه‌ ده‌ست به‌سه‌ر زیاترلە (34) تۆن بگرن و دواتر له‌لایه‌ن لیژنه‌ی تایبه‌تمه‌نده‌وه‌ وله‌ده‌ره‌وه‌ی ناوچه‌ی نیشته‌جێبون له‌ناوبراون، بڕی غرامه‌شی به‌ (15) ملیۆن و (625) هه‌زار دیناره‌ و به‌پێی یاسا و رێنماییه‌ داراییه‌كان ده‌خرێته‌وه‌ سه‌ر داهاتی گشتی.