د. بێوار خنسی راوێژكاری سەرۆكی حكومەتی هەرێمی كوردستان بە ماڵپەڕی فەرمی پارتی ڕاگەیاند" خواست لە دەرەوە لە وڵاتان بۆ غازی سروشتی ھەرێمی کوردستان زۆرە بەتایبەت ئەو ململانێیەی لەنێوان کیشوەری ئاسیا و ئەوروپا لەسەر ڕاکێشانی غازی سروشتی بۆ وڵاتان و نەگونجانیان لەگەڵ یەک ھەڕەشە لەیەکتر دەکەن کە ھەناردەی غاز لەسەر یەکتری ڕابگرن وەکو ئێران غاز بۆ تورکیا نەڕوات و فشارەکانی سەر ئۆکرانیا ئاڵۆزە کە غاز کەم دەڕوات و تورکیاش غازێکی زۆر بەکاردێنێت و نزیکترین شوێنی ڕاکێشانی بۆری غاز بۆ تورکیا کوردستانە، بەڵام ئێمە نابینە شوێنگرەوەی دابینکردنی غاز بۆ ھیچ وڵاتێک و ئەگەر ئەو سەقامگیرییەو ئەمنیەتە بەردەوام بێت دەتوانین غازێکی باش بۆ وڵاتان دابین بکەین".

دکتۆر بێوار خنسی ئاماژە بەوەش دەکات، خۆی گرینگە ئەگەر بتوانی نەوت و غاز لە ناو وڵات بە پیشەسازی بکرێت، بەڵام بۆ ھەناردەکردنی کامە وڵات بەرژەوەندی زیاتری ھەرێم بێت بۆ ئەو وڵاتە ھەناردە دەکرێت، چونکە داھات زیاتر دەبێت و ئێستا تورکیا نزیکترین وڵاتە بۆ ھەرێمی کوردستان بۆ ھەناردەی غاز و پارێزراوتریشە، چونکە ھەندێک وڵات ھەیە بەسەدان ھەزار (کم) بۆرییان ڕاکێشاوە، بەڵام لە ھەرێم بۆ تورکیا زۆر نزیکە، بۆیە لەبەرژەوەندی ھەرێمی و تورکیاش دایە. 

خنسی جەختی لەوەشکردەوە، کە غاز ڕەوانەکرا بۆ دەرەوە سەرچاوەکانی داھات زیاد دەبێت، بەڵام پێویستە بەشێوەیەکی زانستی غاز بکرێتە سەرچاوە و بەشێوەیەک بێت داھاتی ھەرێم زیاد بکات و دەرھێنانی تێچووی زۆر نەبێت و کاریگەری لەسەر دەرھێنانی نەبێت و زوو تەواو بکرێت و تەمەنی درێژ بێت، چونکە ئەگەر بەشێوەی زانستی نەبێت زوو تەواو دەبێت، بەڵام ھەرێم دەوڵەمەندە بەغازی سروشتی و غازەکەی دەگاتە ٥,٧ ملیار پێ سێجا و ساڵانە ١٠٠ ملیۆن پێ سێجا بفرۆشرێت، داھاتێکی زۆر بۆ ھەرێم دابین دەکرێت، چونکە ھەرێم ھاوشێوەی وڵاتان دەوڵەمەندە بەغاز، بۆیە کاری بەردەوامی بۆ دەکرێت و غازیش دەبێتە سەرچاوەیەکی داھات بۆ ھەرێمی کوردستان.