تیمی كوردستانی عێراقی CPT رۆژی پێنجشەممە لە كۆنگرەیەكی رۆژنامەوانیدا رایگەیاند "ئێمە لە تیمی كوردستانی عێراقی CPT سەرباری پێشوازیكردن لە بڕیاری سەرۆكایەتی هەرێمی كوردستان بۆ كەمكردنەوەی حكومی سزادراوانی هەریەك لە رۆژنامەوانان و چالاكوانانی سەربەخۆی بادینان (شێروان شێروانی، گوهدار زێباری، ئەیاز كەرەم، هاریوان عیسا، شڤان سەعید) لە شەش ساڵ زیندانیكردنەوە بۆ دوو ساڵ و چوار مانگ، لەڕێگەی ئەم راگەیەنراوەوە چەند نیگەرانی و سەرنجێك لەسەر دۆسیەی زیندانیانی بادینان بۆ رایگشت و بڕیارەكەی سەرۆكایەتی هەرێم رادەگەیەنین".

ئێمە چاوەڕوان بووین بڕیارەكەی سەرۆكایەتی هەرێم تۆمەتەكانی سەر رۆژنامەوان و چالاكوانە زیندانیكراوەكانی بادینان هەڵبگرێت و دەستبەجێ بڕیاری ئازادكردن و قەرەبووكردنەوەیان بۆ دەربكات، لەهەمانكاتدا دەبوایە ئەو بڕیارە بۆ سەرجەم رۆژنامەوانان و چالاكوانە زیندانییەكانی بادینان دەربكرایە، چونكە دۆسیەی زیندانیانی بادینان یەك دۆسیەیە و هەموو كەیسەكان بە كاری رۆژنامەوانی و رێكخستنی خۆپیشاندان و چالاكی مەدەنیانە لە دەڤەری بادینان و سەرجەمی ئەو چالاكوان و رۆژنامەوانانە لە ماوەی شەش مانگدا دەستگیركراون، بە پشتبەستن بە چاودێریكردنی 17 دانیشتنی دادگاییكردنی دۆسیەی زیندانیانی بادینان، تیمەكەیان جەخت لە نەبوونی بەڵگەی پێویست لە دژی ئەو زیندانییانە و بەڕێوەچوونی پڕۆسەی دادگاییكردنی نادادپەروەرانە و مامەڵەی ناشایستە بەرامبەریان دەكاتەوە.

لێرەوە ناوی ئەو رۆژنامەوان و چالاكوانانەی بادینان رادەگەیەنین كە لە بڕیارەكەی سەرۆكایەتی بەسەریاندا جێبەجێ نابێت:

قارەمان شوكری، رۆژنامەوان- شیلادزێ لە 27ی كانوونی دووەمی 2021ەوە دەستگیركراوە و بەبێ ئامادەبونی پارێزەرەكەی، بە 7 ساڵ زیندانیكردن حوكمدراوە.

نەزیر میكائیل، چالاكوانی سیاسی، لە 11ی شوباتی 2021ەوە دەستگیركراوە و بە 7 ساڵ زیندانیكردن حوكمدراوە.

مەسعود عەلی چالاكوان و مامۆستا، لە 30ی ئابی 2020ەوە دەستگیركراوە و بە 3 ساڵ و نیو زیندانیكردن حوكمدراوە.

شێروان تەها ئەمین، چالاكوان و مامۆستای زانكۆ لە 9ی ئەیلولی 2020ەوە دەستگیركراوە، بە 2 ساڵ و نیو زیندانیكردن حوكمدراوە.

سەرباری حوكمدانی 19 چالاكوان و رۆژنامەنووسی بادینان و سەلماندنی بێتاوانی چالاكوانێك لە دوای ساڵێك و دوو مانگ دەستگیركردن و بەڕێوەچوونی پێنج پڕۆسەی دادگاییكردن بە ناوی (عامر خالید عگید) و ئازادكردنی 26 چالاكوانی تری بادینان لە دوای ساڵێك لەدەستبەسەركردن بەبێ بەڕێوەچوونی هیچ پڕۆسەیەكی دادگاییكردن، لە ئێستادا پێنج چالاكوانی تری بادینان كە خەڵكی شیلادزێن و ماوەی ساڵێك و دوو مانگە لە زیندانی ئاسایشی گشتی هەولێر راگیراون بەبێ ئەوەی دادگایی كرابن یاخود رۆژی دادگاییكردنیان دیاریكرابێت.

مەحمود ناجی ئەحمەد، چالاكوانی مەدەنی لە 13ی كانونی یەكەمی 2020ەوە دەستگیركراوە و تائێستا دادگایی نەكراوە.

كۆڤان تاریق جوبرائیل، چالاكوانی مەجەنی لە 13ی كانونی یەكەمی 2020ەوە دەستگیركراوە و تائیستا دادگایی نەكراوە.

یوسف شەریف، چالاكوانی مەدەنی لە 13ی كانونی یەكەمی 2020ەوە دەستگیركراوە و تائێستا دادگایی نەكراوە.

ئەمجەد رێكانی، چالاكوانی مەدەنی لە 14ی كانونی یەكەمی 2020ەوە دەستگیركراوە و تائێستا دادگایی نەكراوە.

نێچیرڤان بەدیع، چالاكوانی مەدەنی لە 14ی كانونی یەكەمی 2020ەوە دەستگیركراوە و تائێستا دادگایی نەكراوە.

یەكێكی تر لەو چالاكوانانەی بادینان كە لە 13ی تشرینی یەكەمی 2020ەوە دەستگیركراوە و بڕیاربوو لە رۆژی 14ی شوباتی 2022دا دادگایی بكرێت، بەڵام دادگاییكردنەكەی بۆ رۆژی 28ی شوباتی 2022 دواخرا بێریڤان ئەیوب حەسەنە كە دایكی پێنج منداڵە و 16 مانگە لە زینداندایە بەبێ ئەوەی دادگایی كرابێت.