ئەمشەو چەكدارانی داعش، هێرشیان كردە سەر گوندێكی كوردنشینی ناوچەی هەفتەغاری سەر بە قەزای داقوقی پارێزگای كەركوك و هاوڵاتییەكیش بریندارە.
هیوا ڕەشید، بەرپرسی ناوچەی داقوقی پارتی دیموكراتی كوردستان بە (باسنیوز)ی نزیك لە پارتی راگەیاندووە "ئەمشەو هەشت چەكداری داعش هێرشیان كردە سەر سەنگەرێكی گەنجانی خۆبەخشی گوندی مەنسووری كوردنشینی ناوچەی هەفتەغاری سەر بە قەزای داقوق كە لەو سەنگەرە گەنجانی گوندەكە گوندەكەیان دەپارێزن".
ناوبراو ئاماژەی بەوەكردووە "لە ئەنجامی ئەو هێرشەی داعش كەسێكی خۆبەخشی گوندەكە كە لەو سەنگەرە بووە بە ناوی (ئەحمەد محەمەد) بریندار بووە و پاشان دانیشتووانی گوندەكە بە چەكی خۆیان رووبەڕووی چەكدارەكانی داعش بوونەتەوە و دواتر هێزێكی سەر بە سوپای عێراقیش گەیشتوونەتە گوندەكە".