ئەنجومەنی ئاسایشی هەرێم ڕایدەگەیەنێت" بەرپرسیاریەتی تەواوی ئەو هێرشانە دەکەوێتە ئەستۆی چهند گروپێكی "تیرۆریستی" و باجی ئەو هێرشانەش دەدەنەوە".
ئەنجومەنى ئاسایشى هەرێم لەسەر مووشەکەکانی قەزای خەبات ڕاگەیەندراوێکی بڵاوکردەوە و دەڵێت"
چەندین جارە لە شوێنێکی دیاری سنووری شارۆچکەی حەمدانیە، کە دەکەوێتە نێوان بارەگای فەوجی مەغاویری فەرماندەیی ئۆپەراسیۆنەکانی نەینەوا و بارەگای چەکدارانی عەسائب لە بەرتەلە و بارەگای لیوای (٣٠)ی حەشدی شەبەک، لە لایەن گرووپە لە یاسادەرچووەکان هێرشی مووشەکی دەکرێتە سەر هەرێم".
ئەوەشی خستەڕوو، بەرپرسیاریەتی تەواوی ئەو هێرشانە دەکەوێتە ئەستۆی ئەو گرووپانە و باجی ئەو هێرشانەش دەدەنەوە.
دەقى راگەیەندراوەکە:
راگەیەندراوێک لە ئەنجومەنی ئاسایشی هەرێمی کوردستان
وا بۆ چەندین جارە لە شوێنێکی دیاری سنووری شارۆچکەی حەمدانیە، کە دەکەوێتە نێوان بارەگای فەوجی مەغاویری فەرماندەیی ئۆپەراسیۆنەکانی نەینەوا و بارەگای چەکدارانی عەسائب لە بەرتەلە و بارەگای لیوای 30ی حەشدی شەبەک، لە لایەن گرووپە لەیاسادەرچووەکان هێرشی مووشەکی دەکرێتە سەر هەرێمی کوردستان.
ئەو شوێنانە لەژێر کونتڕۆڵی هێزەکانی حکوومەتی فیدراڵین و دوور نین لە بارەگا جێگیرەکانی هێزە چەکدارەکانی حکوومەتی فیدراڵی.
داوا لە سەرۆکوەزیران و حکوومەتی فیدراڵی دەکەین ئەو ناوچەیە کە بووەتە پەناگە و شوێنی هێرشکردنە سەر هەرێمی کوردستان لەو تیرۆریست و چەتانە پاک بکەنەوە و ئارامی و سەقامگیری دەستەبەر بکەن.
بەرپرسیاریەتی تەواوی ئەو هێرشانە دەکەوێتە ئەستۆی ئەو گرووپە تیروریستییانە و باجی ئەو هێرشانەش دەدەنەوە.
لەگەڵ حکوومەتی فیدراڵی هەماهەنگی دەکەین بۆ رووبەڕووبوونەوەیان و کوتاییهێنان بەم کردارە تێکدەرانە.
ئەنجومەنی ئاسایشی هەرێمی کوردستان