بازرگانێكی "مەترسیدار"ی ماددە هۆشبەرەكان لە هەرێمی كوردستان لە بازگەیەكی سنووری ئیدارەی سەربەخۆی سۆران دەستگیركرا.
بنكەی نەهێشتنی ماددە هۆشبەرەكانی سۆران لە راگەیەندراوێكدا رایگەیاندووە "دوای چەندین ساڵ بەدواداچوون، كۆكردنەوەی زانیاری و چاودێری ورد سەرەنجام هێزەكانی بنكەی نەهێشتنی ماددە هۆشبەرەكانی سۆران توانیان تۆمەتبار ( س.ع.خ ) یەكێك لە گەورەترین بازرگانەكانی ماددەی هۆشبەر لە هەرێمی كوردستان لە بازگەی گۆجار سەر بە ئیدارەی سەربەخۆی سۆران دەستگیری بكەن".
راگەیەنراوەكە ئاماژەی بەوەشكردووە "تۆمەتبار خەڵكی ئیدارەی راپەڕینە و دانیشتووی قەلادزێ و وڵاتی ئێرانە و پشكی شێری هەبووە لە بڵاوكردنەوەی ماددە هۆشبەرەكان بە هەموو جۆرەكانی كریستال، هێرویین و تریاك لە هەرێمی كوردستان".
لە راگەیەندراوەكەدا هاتووە "لە ماوەی ئەم چەند ساڵە هێزەكانی نەهێشتنی ماددە هۆشبەرەكان، توانیان دەست بگرن بە سەر رێژەیەكی زۆر لە جۆرەكانی ماددەی هۆشبەر و حەبی هۆشبەر و چەندین ئۆتۆمبێل و دەستگیر كردنی ژمارەیەكی زۆر لە ئاڵوودەبووان و فرۆشیارانی ماددەی هۆشبەر كە كاریان بۆ ( س.ع.خ ) كردووە. ناوبراو سەرپەرشتی باندەكی گەورەی هاوردە كردن و بڵاوكردنەوەی ماددە هۆشبەرەكانی دەكرد و بە دەستگیركردنی ئەم بازرگانە، ماددەی هۆشبەر لە سنووری پارێزگای هەولێر بە شێوەی بەرچاو روو لە كەمبوون دەكات".