ژنێكی خەڵكی ڕۆژهەڵاتی كوردستان بەبیانوی ئەوەی منداڵی كوڕی نابێت لەلایەن هاوسەرەكەیەوە بەشێوەیەكی "دڕندانە" كوژراوە.
ڕێكخراوی مافی مرۆڤی هەنگاو رایگەیاندووە "ئەو ژنە كوژراوە ناوی (گوڵجەمین نەجەفی) تەمەن 46 ساڵە و خەڵكی شارۆچكەی گاوارە سەر بە شاری داڵاهۆ لە پارێزگای كرماشانە".
بەپێی هەواڵی رێكخراوەكە "گوڵجەمین دایكی سێ كچە، بە بیانووی ئەوەی منداڵی كوڕی نەبووە بەردەوام لەلایەن هاوسەرەكەیەوە بێڕێزی پێكراوە و ئازاردراوە و دواجار ماوەیەك پێش كوژرانەكەی تۆراوە و چووەتەوە ماڵی باوكی".
ڕێكخراوەكە ئاماژەی بەوەكردووە "ڕۆژێك هاوسەرەكەی (ع.ئ.ڕ.) چووەتە ماڵ خەزووری و ناوبراوی بردووەتەوە بۆ ماڵ و دواتر "شتێكی ڕەق و سەختی لە سەری داوە و كوشتوویەتی".
وەك رێكخراوی هەنگاو بڵاویكردۆتەوە "هاوسەری ژنەكە بە مەبەستی بەلاڕێدابردنی بابەتەكە تەرمی هاوژینەكەی بردووەتە جادەیەكی چۆڵ و بە ئۆتۆمبێل بەسەر سەریدا ڕۆیشتووە و دواتر بانگەشەی ئەوەی كردووە كە لەكاتی ڕۆیشتن دەرگای ئۆتۆمبێلەكەی كراوەتەوە و گوڵجەمین كەوتووەتە خوارەوە و سەری كەوتووەتە بەر تایەی دواوەی ئۆتۆمبێلەكە و بەهۆیەوە مردووە، بەڵام هاوسەرەكەی لەلایەن هێزەكانی پۆلیسەوە دەستبەسەر كراوە".