نەوزاد شێخ كامیل،بەڕێوەبەری گشتی بازرگانی لە وەزارەتی بازرگانی و پیشەسازی حكوومەتی هەرێمی كوردستان، لە لێدوانێکدا بە میدیای پارتی ڕاگەیاند" ئەمساڵ تا ئێستا شەش بەشەخۆراكی مانگانە هاتووە، ئەو شەش بەشەخۆراكە بە جۆرێكە، كە لە بەشی چوارەم و پێنجەم هەندێك كەلوپەلی خۆراك نەهاتوون، ئەوانەی هاتوون دابەشمان كردوون".

ئاماژەی بەوەشکرد، بەشی شەشەم برنج و زەیت و شەكر هاتووە و لە هەندێك شوێن ئاوەتەماتەش هاتووە، بەڵام لە هەندێك شوێن هێشتا ئاوەتەماتەی مانگی پێنج نەهاتووە، هەروەها فاسۆلیای بەشی چوارەم نەهاتووە، رۆژانە بەشەجیاوازەكانی خۆراك دێن و ئێمەش دوای پشكنین، دابەشی سەر بریكارەكانی خۆراكیان دەكەین و دەدرێتە هاووڵاتییان.

نەوزاد شێخ كامیل هاووڵاتییانی دڵنیا كردەوە و وتی" هیچ خۆراك و بەشەخۆراكێك نافەوتێت و ئەوەی دێت دابەشی دەكەین، بەڵام هەندێك جار دوادەكەوێت، بۆ نموونە، لە شارێك مادەیەكی خۆراك دراوە، لە شارێكی دیكە نەدراوە، بەڵام لەكۆتاییدا هەر دێت و دابەشی دەكەین".

بەرپرسەکەی وەزارەتی بازرگانی هەرێم جەختیشیكردەوە، چەند ساڵە تەنیا شەش بەشەخۆراك دابەش دەكرا، بەڵام ئەمساڵ زیاتر دەبێت و رەنگە تا كۆتایی ئەمساڵ، چەند بەشەخۆراكێكی دیكەیش دابەش بكەین.

بەگشتی، سەبەتەی خۆراکی هاوڵاتییان پێکهاتووە له (شەکر، زەیت، دۆشاوی ته‌ماتە، فاسۆلیا، لەتکەنۆک، برنج و ئارد).