وەزیرى پەروەردەى هەرێم رایدەگەیەنێت" هەوڵەکانمان سەرکەوتوو بوو بۆ ئەوەى عێراق بڕیارێک دەربکات سەبارەت بەوەى لە کاتى دەرنەچوونى هەر خوێندکارێک لە زمانى کوردى خوێندکارەکە بەکەوتوو هەژمار بکرێت".
ئالان حەمە سەعید وەزیری پەروەردەی حکومەتی هەرێمی کوردستان لە راگەیەنراوێکدا کە وێنەیەکی دەست (سپی) کەوتووە ئاماژەى بەوەکردووە" پاش دەرچوونی گشتاندنێک لە وەزارەتی پەروەردەی عێراقی فیدراڵ لە (٦ ی ١٠ ی ٢٠٢٢) سەبارەت بەوەی زمانی کوردی لە قوتابخانەکانی وەزارەتی ناوبراو دەرنەچوونی تێدانییە و لە تاقیکردنەوەی گشتیی هەژمار ناکرێت، لەسەر فەرمانی جەنابی سەرۆکی حکومەتی هەرێمی کوردستان، ئێمە لە وەزارەتی پەروەردە هەر هەمان ڕۆژ لە لەگەڵیان لە پەیوەندیدابووین".
ڕاشیگەیاندووە" لە ئەنجامدا ڕێککەوتین کە شاندێکی وەزارەتی پەروەردەی عێراق سەردانی وەزارەتمان بکەن ، بۆیە لە ١٠ ی ١٠ی ٢٠٢٢ شاندێک لەوەزارەتی پەروەردەی عێراق، بۆماوەی سێ رۆژ لە هەرێمی کوردستان مانەوە و گفتوگۆکانمان بەردەوام بوو، سەرەنجام کۆنووسێکی هاوبەش نووسراویەوە و بەندە و بەرێز وەزیری پەروەردەی عێراق لە کابینەی پێشوو، لە ١٣ ی ١٠ ی ٢٠٢٢ واژۆمان کرد و ڕەزامەند بووین، مانگێکیش دانرا کە دەبێت هەر دوو وەزارەت گشتاندن بەو ڕێککەوتنە دەربکەین".
ئەوەش هاتووە" سەرەنجام هەوڵەکانمان سەرکەوتووبوون و لە ٢٤ ی ١٠ ی ٢٠٢٢، بەرێوەبەرایەتی گشتیی هەڵسەنگاندن و ئەزموونەکان لە وەزارەتی پەروەردەی عێراقی فیدراڵ، گشتاندنی پێویستی دەرچوواند کە زمانی کوردی (دەرنەچوون)ی تێدایە و ئەگەر قوتابی لەبابەتی زمانی کوردی نەگەیشتە نمرەی پێویستی دەرچوون، ئەوا بەدەرنەچوو دادەندرێت".