سەعدی پیرە، ئەندامی مەكتەبی سیاسی یەكێتی نیشتمانی بە (باسنیوز)ی نزیك لە پارتی راگەیاندووە "یەكێتی و پارتی وەك دوو لایەنی جیا و خاوەن جیهانبینیی جودا، ئاساییە ناكۆكییان هەبێت، بەڵام لە رێی میدیا و شەڕی سۆشیال میدیاوە ناكۆكییەكان چارەسەر ناكرێت، بەڵكو دەبێت هەوڵی خاوكردنەوەی گرژییەكان بدرێت و بە وردی لێكۆڵینەوەیان لەسەر بكرێت، تا چارەسەر بكرێن، ئەمەش بە یەكتربینین و دانیشتن دەبێت".

پیرە روونیكردەوە "سەردانی پارتی بۆ لای لایەنە سیاسییەكان بە یەكێتیشەوە كە بڕیارە بكرێت، كارێكی باشە، چونكە بە دڵنیاییەوە گفتوگۆ لەسەر ناكۆكییەكان دەكرێ و هەوڵی خاوبوونەوەی گرژییەكان دەدرێت".

ئەو سەركردەیەی یەكێتی وتیشی "حكومڕانییەكی هاوبەش كە لە یەكێتی و پارتی پێكدێ لە هەرێمی كوردستان دەكرێ، ناكرێ لەگەڵ یەك قسە نەكەن، گرنگە پارتی و مەكتەبی سیاسی نوێی پارتی بە دەنگ نیگەرانییەكانی یەكێتییەوە بێن، ئێمە پێشوازی لە شاندی پارتی دەكەین، دڵنیاشم لەنێو پارتییەوە هەوڵی ئەوە دەدەن كە ئەم كێشانەی هەن بە شێوەیەكی باش چارەسەر بكرێن".