لە دیدارێکی نێوان سەرۆکی عێراق و سەرۆکی پارتی هەردوولا جەختیان کردەوە کە پشتیگری لە کابینەکەی سودانی دەکەن.
لە راگەیاندراوێکدا کە دوای کۆبوونەوەی نێوان لەتیف رەشید سەرۆک کۆماری عێراق مەسعود بارزانی سەرۆکی پارتی لە پیرمام سازکرا، راگەیەندرا" ئەوە خرایە ڕوو کە پێویستە گرفتەکان دوور لە زمانی هەڕەشە و لەسەر بنەمای دیالۆگ چارەسەر بکرێن".
دەقی ڕاگەیەنراوەکە:
سەرۆک بارزانی پێشوازی لە سەرۆککۆماری عێراق دەکات..ڕۆژی سێشەممە 15ی تشرینی دووەمی 2022 لە سەلاحەددین سەرۆک مەسعود بارزانی پێشوازی لە بەڕێز د.لەتیف ڕەشید سەرۆک کۆماری عێراق کرد.
لە دیدارەکەدا بارودۆخی سیاسیی عێراق و پێشهاتەکانی ناو پڕۆسەی سیاسی و هەنگاوەکانی حکوومەتی تازەی عێراق تاوتوێ کرا و هەردوولا پاڵپشتیی خۆیان بۆ حکوومەتی عێراق و جێبەجێکردنی بەرنامەکەی حکوومەت دووپات کردەوە.
هەر لەو دیدارەدا ڕۆشنایی خرایە سەر پەیوەندییەکانی عێراق و وڵاتان و کۆمەڵگەی نێودەوڵەتی و جەخت لە ڕۆڵ و پێگەی عێراق لە ناوەندە هەرێمی و نێودەوڵەتییەکان کرایەوە. هەروەها ئەوەش خرایە ڕوو کە پێویستە گرفتەکان دوور لە زمانی هەڕەشە و لەسەر بنەمای دیالۆگ چارەسەر بکرێن.