پێشبینی دەكرێت ئەو شەپۆلە بارانەی رووی لە ناوچەكانی سلێمانی و دەوروبەری كردووە تا سبەی نیوەڕۆ بەردەوام بێت، بەڵام لە ئێوارەی چوارشەممەوە شەپۆلەكە دەست پێدەكاتەوە.
ئاراس جەبار، شارەزای كەشناسی رایگەیاندووە، لەكاتەكانی ئێستا بەدواوە بەگشتی كاریگەری بای چالاكی باشوری رۆژئاوا كەم دەبێتەوە و ئەگەرەكانی بارانبارین زیاتر ئەبێت كە تا سبەی پێشنیوەرۆ ناوبەناو ھەورە تریشقە و تاوە باران ئەبێت بەتایبەت لەسنوری ناوچەكانی پارێزگای سلێمانی و ھەڵەبجە و ئیدارەی گەرمیان.
ناوبراو ئاماژەی بەوەكردووە، لەھەندێ كات و ناوچەدا ئەگەری تاوە بارانی بەخوڕ و تەرزە ئەبێت لەگەڵ چالاكبوونی ھەورە بروسكەی بەھێز بە كاریگەری كەمتریش لە سنوری ئیدارەی راپەرین و ناوچە شاخاویەكانی خۆرھەڵاتی پارێزگای ھەولێر ئەگەری باران و ھەورە بروسكە ئەبێت تەواوی ناوچەكانی دیكەی ھەرێم ئەگەری نمە باران ئەبێت و سبەینێ كاریگەری ئەم ناسەقامگیریە كۆتایی پێدێت .
ئاراس جەبار روونیكردۆتەوە، لە ئێوارەی رۆژی چوارشەمەوە جارێكی دیكە ئەگەر ھەیە شەپۆلێكی دیكەی چڕی باران و ھەورە بروسكە ناوچەكە بگرێتەوە كە بەھەمان شێوە زیاتر كاریگەری لەسەر ناوچەكانی پارێزگای سلێمانی و ھەڵەبجە و گەرمیان ئەبێت.