"بەهۆی ئەو بارانە زۆرەی لەم ماوەیەدا لە کوردستان باریوە، ئاستی بەرهەمهێنانی کارەبا لە هەرێم زیاددەکات".
وتەبێژی وەزارەتی کارەبا ئومێد ئەحمەد ڕایگەیاند، بەرهەمهێنانی کارەبا لە هەرێمی کوردستان، جگە لە وێستگەکانی گاز و نەوتی رەش و گازوایل، پشت بە دوو وێستگەی گەورەی کارۆئاوی دەبەستێت، ئەوانیش وێستگەی دەربەندیخان و دوکانن.
باسی لەوەشکرد، هەردوو بەنداوی دوکان و دەربەندیخان لە چەند ڕۆژی ڕابردوودا ئاوێکی زۆریان گلداوەتەوە و کە لە هەر چرکەیەکدا زیاتر لە ٣٠٠ مەتر سێجا ئاو ڕژاوەتە بەنداوەکانەوە.
سەبارەت بە ئاستی ئاوی هەردوو بەنداوەکە ئومێد ئەحمەد ئاماژەی بەوەدا، لە ئێستادا ئاستی ئاوی بەنداوی دوکان ٤٩٣،٤٣ مەترە و ئاستی ئاوی بەنداوی دەربەندیخانیش ٤٦٨،٨٠ مەترە کە هەردوو بەنداوەکە بەشدارن لە بەرهەمهێنانی کارەبای هەرێمی کوردستان.