زانا مەلا خالید ئاماژەی بەوەشکرد، ئەمڕۆ داواکارییەکیان ئاڕاستەی سەرۆکایەتی پەرلەمانی کوردستان (ماوە بۆدرێژکراوە) کردووە کە بریتییە لە زیادکردنی دوو بڕگە بۆ کارنامەی دانیشتنی سبەینێ کە یەکێکیان کاراکردنی کۆمیسیۆنی باڵای سەربەخۆی هەڵبژاردنەکان لە خۆدەگرێت و دووەمیان هەموارکردنەوەی یاسای هەڵبژاردنە.
هەروەها سەرۆکی فراکسیۆنی پارتی لە پەرلەمانی کوردستان (ماوە بۆدرێژکراوە) لە بەشێکی دیکەی پەیامەکەیدا ئاشکراشیکرد، لە هەموو کۆبونەوەکانیان لەگەڵ (یەکێتی نیشتیمانی کوردستان و بزوتنەوەی گۆڕان و کۆمەڵی دادگەری و یەکگرتووی ئیسلامی) هەوڵیانداوە بۆ گەیشتن بە ڕێککەوتن لەسەر چۆنیەتی هەموارکردنەوەی یاسای هەڵبژاردن و پرسی کاراکردنەوەی کۆمسیۆن لەسەر بنەمای داواکاری ئەو لایەنە سیاسیانە کە کۆمیسیۆنی ئێستا بۆ هەڵبژاردنی داهاتوو وەکو خۆی کارابکرێتەوە و
کار بە بنەمای بەرکەوتەی ئەنجامی هەڵبژاردنی ساڵی (٢٠١٨) نەکرێت.
وتیشی" پارتی بە مەبەستی ئەنجامدانی هەڵبژاردن پێشنیازی لایەنە سیاسییەکانی دیکەی قبوڵکرد، هەروەها هەموارکردنەوەی یاسای هەڵبژاردنیشی قبوڵکرد لەگەڵ ئەو پێشنیازانەی کە لەلایەن ئەو لایەنانە پێشکەشکران، بە تایبەتی یەکێتی داوایان لێکردین کە هەرێمی کوردستان لە بری یەک بازنەی چوار بازنەی هەڵبژاردنی هەبێت و سیستمی کاندیدکردن بکرێت (٥٠% بە ٥٠%)،
بۆ ئەوەی شێوازی دەستنیشانکردنی کاندید نیوەی بە لیستی کراوە و نیوەکەی دیکەی بە لیستی نیمچە کراوە بێت، ئامێری ئەلیکترۆنی کۆمسیۆنی عێراق بکرێتە بنەما و دابەشکردنی کورسی بەسەر پارێزگاکاندا لەسەر بنەمای ئاماری وەزارەتی پلاندانانی عێراقی بێت".