سەرچاوەیەكی ئەمنی لە پارێزگای زیقاڕ رایگەیاند، "ئێوارەی ئەمڕۆ لەئەنجامی روداوێكی هاتوچۆ لەسەر رێگای خێرای زیقاڕ-بەسڕە نۆ كەس گیانیان لەدەستدا و ٣٣ كەسی دیكەش برینداربون كە سەرجەمیان زیارەتكاری ئێرانی بون".
ئێوارەی ئەمڕۆ دووشەممە ٢٨ی ئابی ٢٠٢٣، سەرچاوەیەكی ئەمنی ڕایگەیاند:" ئێوارەی ئەمڕۆ پێكدادان لەنێوان پاسێكی گواستنەوەی زیارەتكارانی ئێرانی لەگەڵ بارهەڵگرێك كە بەرەو كەربەلا دەڕۆیشتن لەسەر رێگای خێرای زیقاڕ-بەسڕە رویدا".
ئەو سەرچاوەیە وتیشی، "لەئەنجامی ڕوداوەكە نۆ سەردانكەری ئێرانی گیانیان لەدەستداوە و ٣٣ كەسی دیكەش برینداربون كە زۆربەیان باری تەندروستییان ناجێگیرە".
ئاماژەی بەوەشكرد، هێزە ئەمنی و تیمە پزیشكییەكان گەیشتونەتە شوێنی روداوەكە، بریندارەكان بۆ نەخۆشخانە بەمەبەستی وەرگرتنی چارەسەر گواستراونەتەوە، هاوكات تەرمەكانیش بۆ پزیشكی دادوەری گواستراونەتەوە بۆ تەواوكردنی ڕێكارە یاساییەكان.