لەشەڕو پێكدادنێكدا لەنێوان پێشمەرگەكانی حیزبی دیموكراتی كوردستان‌و هێزەكانی سوپای پاسداران، پێنج فەرماندەی باڵای سوپا لەناوچەی پیرانشاری رۆژهەڵاتی كوردستان كوژران.

بە پیی‌ راگەیەندراوی‌ لیپرسراوی‌ میدیایی‌ پاریزەرانی‌ رۆژهەڵات كە ئەمرۆ بڵاوبۆتەوه ”پاریزەرانی رۆژهەڵات هەڵیان كوتایە سەر سەنگەرەكانی هیزەكانی ڕیژیم و بە جۆرێك ئاگربارانیان كردن كە هەموانیان بە شپرزەیی لە حەشارگەكانیان دەرپەڕاند. ئەم زەبرەی ڕۆڵەكانی نیشتمان بە ڕادەیەك تووشی ترس و شلەژاویی كردبوون كە دوای تیكشكان و لە كاتی راكردنیش دا، جاشەكان و هیزی ئینتیزامی سەرلێشێواوانە تەقە لە یەكتر دەكەن و ژمارەیەكی دیكەشیان بەم هۆیەوە دەكوژرێن و بریندار دەبن.”.

لە دریژەی‌ راگەیەندراوەكە ناوی‌ پینج لیپرسراوی‌ باڵای‌ سپای‌ پاسداران هاتووە كە بە دەستی‌ ئەم هیزانە كوژران كە بریتین لە:
1ـ حەیدەر زولفەقاری فەرماندەی یەكێك لە پایگا نیزامییەكانی ناوچەی لاجانه. 2- شاهین كەریمی 3- كەریم عەلیزادە 4- عەلی قوڵیزادە. 5ـ شاهین ناوێكی دیكە هەیە كە شۆرەتەكەی نەزانراوە. ئەو كوژراوانە بە تەراكتۆر لە شوێنی شەڕگە دوور خراونەوە.”.

راگەیەندراوەكە دەلیت:”ماڵپەڕەكانی سەر بە دەزگای ئیتلاعات و سپای پاسدارانی كۆماری ئیسلامی، دانیان بە كەمین دانانەوەی هێزەكانی خۆیان لە ناوچەی بەربنەی پیرانشار بۆ پارێزەرانی ڕۆژهەڵاتی كوردستان‌دا ناوە و باسی "تێكهەڵچوونی سەختی چەندین كاتژمێرەدا”‌یان لە نێوان زیوكە و ماشكان دا كردوە. بەلام ئاماری كوژراوانی خۆیان لە خەڵك شاردوەتەوە”.

ماوەیەكە پێشمەرگەكانی حیزبی دیموكراتی  كوردستان لە ژێر ناوی "پارێزەرانی رۆژهەڵات" لەناو كوردستانی رۆژهەڵات چالاكی سەربازییان دەستپێكردوەتەوە.