رێبوار كەریم وەلی رۆژنامەنوسی كادیری دیاری پارتی دیموكراتی كوردستان لە وتارێكدا لەسەر گرژییەكەی ئەم دواییەی نێوان پەكەكە‌و حیزبی دیموكراتی كوردستان، هێرشی توند دەكاتەسەر یەكێتی نیشتمانی كوردستان‌و پارتی كرێكارانی كوردستان.

رێبوار لەوتارەكەیدا دەنوسێت: لە كاتێكدا كە یەكێتی نیشتمانیی كوردستان لە هەموو ئاستەكاندا بێ ئەوەی بزانێ بۆچی (ئەڵبەتە هەندێكیان رەنگبێ بزانن بۆچی) سەقەربەر بوونە بۆ پشتیوانی لە سەركەوتنی هەدەپ لە توركیا و پەیامەكەیان بریتییە لە پشتیوانیی خەباتی نەتەوەیی كورد لە هەر كوێیەك بێت، پەكەكەی خاوەنی هەدەپ، رووی چەكەكانی خۆی بەرامبەر توركیای خۆشەویست! بێدەنگ كردووە و خستوویەتیە خزمەتی ئێرانی باوك.

هەروەها دەنوسێت: رووداوەكانی ئەو چەند رۆژەی رابردوو ئیسپاتی ئەو ئیدیعا دێرینەی كرد كە پەكەكە پتر لەوەی پاسەوانی سنوورەكانی كوردستانی باشوور بێت لە هەڕەشەی تیرۆریستانی ئیسلامی، پاسەوانی سنوورەكانی ئێرانە لە دژی شۆڕشگێڕانی رۆژهەڵاتی كوردستان. سەرەتا، لەگەڵ تەقینەوەی رق و كینەی خەڵكی رۆژهەڵاتی كوردستان بەرامبەر بەو دەستدرێژییەی كە كرایە سەر پاكیزەیەكی كورد لە مەهاباد، پەكەكە ویستی بە هەموو شێوەیەك رووداوەكە لە قازانجی خۆی بقۆزێتەوە، كە ئەوەشی بۆ نەچووە سەر، ئینجا فەرخەكەی خۆی واتا پژاكی خستە كار، بەڵام سەیر لەوەدا بوو كە چالاكیی پژاك لە دژی كۆماری ئیسلامیی ئێران پێش ئەوەی لە لایەن پژاكەوە بڵاوبكرێتەوە لەلایەن رژێمی ئێرانەوە راگەیەندرا!

رێبواری كەریم وەلی كە كارمەندێكی كەناڵی رووداوە، هەروەها لەوتارەكەیدا دەنوسێت: گەمارۆدان و شەهیدكردنی پێشمەرگەكانی حیزبی دیموكراتی كوردستان (میراتی پێشەوا قازی محەممەد) رووی راستەقینەی پەكەكە و یەكێتی دەرخستووە. كۆیە و كێلەشین دوو پەڵەی رەشن بە ناوچاوانیانەوە. ئەمڕۆ سەركەوتنی هەدەپ لە هەڵبژاردن گرنگترە یان رزگاریی كوردی رۆژهەڵات؟ ئایا یەكێتی دەتوانێ وەڵامی ئەو پرسیارە بداتەوە كە ئەگەر هەدەپ رێژەی 10% تێپەڕێنێ چ سوودێكی بۆ دۆزی كورد لە توركیا دەبێ؟ كەس ئەوەی لەخۆی پرسیوە كە نەیارانی حیزبەكەی ئەردۆغان چییان بۆ كورد پێیە؟ ئەو هاشوهوشەی یەكێتی لە كوردایەتی و نیشتمانپەروەری نییە، موزایەدەیەكی رووتە و وەك قەرەبووی شكستی خۆیان لە گۆڕەپانی سیاسیی كوردستانی باشوور بە خەڵكی ئێرەی دەفرۆشنەوە. تاقیگەی ناسیۆنالیزمی كوردی، كیان و بە نەتەوەبوون لە كوردستانی باشوورە، بەڵام یەكێتی و پەكەكە لێی دەرنەچوونە. هەردووكیان لە مەرایی و پاڵپشتی بۆ روانگەی ئێرانی شیعی لە ناوچەكەدا و پاراستنی سنوورەكانی سایكس پیكۆ قسووریان نەكردووە.

رێبوار لەبەشێكی دیكەی وتارەكەیدا دەڵێت كە ساڵی 92 تاڵەبانی عەبدوڵا ئۆجەلانی بە عەوڵا شێت نادەبرد‌و دەنوسێت:  دێنمەوە، هەموو شانازیی یەكێتی ئەوەیە كە كاتی خۆی لە نەوەدەكان سكرتێری گشتیی ئەو حیزبە (جەلال تاڵەبانی) دەسپێشخەریی كردووە لەوەی پەكەكە و رژێمی توركیا دەست بە دانوستاندن بكەن و لە رێگەی گفتوگۆوە كێشەی كورد لە توركیا چارەسەر بكەن، تا ئێرە هەمووی ئاساییە و جێگەی دەستخۆشیشە. بەڵام حاڵەتی نائاسایی ئەوەیە كە مام جەلال لە 1992 سەرۆكی پەكەكەی بە"عەوڵا شێت" ناوبرد، جا چییە؟ رەنگبێ ئەوكاتە كابرا شێت بووبێ و دوایی چاك بووبێتەوە، بەڵام سەیر ئەوەیە كە دوای دوو ساڵ هەمان شێت (عەبدوڵڵا) لەسەر دەستی تاڵەبانی كە خۆی شێخ بوو، نەك هەر چاك نەبووەوە، بگرە بووە "مەجنوون"یش. كەس نازانێ "لەیلا" كێ بوو، بەڵام "شفرەی" نێوان جەنگیز چاندار (كە ئەوكاتە راوێژكاری تورگوت ئۆزال بوو)، تاڵەبانی و ئۆزال ئەمە بوو: "مەجنون واتە (عەبدوڵڵا ئۆجەلان) داوای دانوستاندن دەكات".
 
لەوتارەكەدا هەروەها هاتووە:  كەسێك ئەگەر كەمێك هەستی كوردایەتیی تێدا بێت، نابێ دڵی بەوە توند بێت كە كورد لەهەر شوێنێك هەبێت سەربكەوێت. بەڵام حیزبێك كە خۆی لە هەموو بەها نەتەوەییەكان داماڵیبێ و ئیدعای توركیاییبوون بكات (رێك وەكو ئەوەی كە حیزبی شیوعی لە حەفتاكان هەزاران كوردی پێ دەستخەڕۆ كرد و بووە هاوپەیمانی بەعس) چی لێ چاوەڕوان دەكرێت؟ بۆ یەكێتی پشتیوانی لەو حیزبانەی دیكەی كوردستانی باكوور ناكات كە لە هەڵمەتی هەڵبژاردنەكانیاندا داوای فیدراڵی بۆ كوردستانی باكوور دەكەن؟! یان بۆ بەرامبەر بە سەركوت و قەتڵوعامی كورد لە رۆژهەڵات بێدەنگە؟ بەڵام مەسەلەكە روونە كە دژایەتیی بارزانییە.