یەكگرتوو: ئەو دەستە ڕەشانە ڕسوا دەكەین كە كەرامەتی مرۆڤەكان دەشكێنن
فراكسیۆنی یەكگرتوو لەپەرلەمانی كوردستان لە راگەیەنراوێكدا هێرش كردنەسەر رۆژنامەنوس (مصعب عبدالعزیز) مەحكوم دەكەنو دەنوسن: بە شەمشەمەكوێرەكانی تاریكی دەڵێین ئەم كارە قێزەونانە نەك ڕاگەیاندنكارە سەربڵندەكانی یەكگرتوو سارد ناكاتەوە بەڵكو گەرم تر و سوورتریان دەكات.
دەقی راگەیەنراوەكە:
ئێمە لە فراكسیۆنی یەكگرتووی ئیسلامی كوردستان ڕووداوی شەوی ڕابردوو كە لە هەولێر هێرش كرایە سەر ڕۆژنامەنوس و بێژەری كەناڵی ئاسمانی سپێدە (مصعب عبدالعزیز ) مەحكوم و ئیدانە دەكەین و ئەو دەستە ڕەشانە ڕسوا دەكەین كە كەرامەتی مرۆڤەكان دەشكێنن و ئازادی ڕادەربڕین سنوردار دەكەن و لەبەرامبەر ووشە و دیالۆگدا پەنا بۆ شێوازی نا دیموكراسی و نا شارستانی دەبەن .
وێڕای هاوسۆزی وپشتیوانیمان بۆ كاكە (مصعب) بە شەمشەمەكوێرەكانی تاریكی دەڵێین ئەم كارە قێزەونانە نەك ڕاگەیاندنكارە سەربڵندەكانی یەكگرتوو سارد ناكاتەوە بەڵكو گەرم تر و سوورتریان دەكات لەسەر گەیاندنی پەیامی ڕاستی و حەق بێژی و بەرگری كردن لەئازادی وگەیاندنی زانیارییەكان بە هاوڵاتیانی خۆشەویستی كوردستان .
هەروەك داواكارین لە دەزگاكانی ئاسایش وپۆلیس كە چاوكراوەتر بن بۆ پاراستنی سەروماڵی هاوڵاتیان و دۆزینەوەی تۆمەتباران وڕادەست كردنیان بە عەداڵەت ویاسا .
فراكسیۆنی یەكگرتوو
لە پەرلەمانی كوردستان
25/8/2015
PM:04:29:25/08/2015