یەکێتی نیشتیمانی پەیامێك ئاراستەی ئەندامەكانی خۆی دەكات
یەکێتیی نیشتیمانی کوردستان پەیامێک بۆ ئەندامان و رێکخستنەکانی حزبەیکەی
دەنێرێت و لەو پەیامەدا داوا دەكات "پێویستە ئێوەش ڕۆڵی كاریگەرتان هەبێت
بە ئاراستەی هێمنی شەقام".
لە پەیامەكەدا هاتووە،داواكارین هێزە ئەمنیەكان بەڕۆڵی كاریگەری خۆیان هەڵبستن و هێمنی و ئاسایشی تەواو بۆ هاوڵاتیان دابین بكەن.
دەقی رێنماییەکە:
بۆ سەرجەم هەڤاڵان و ئەندامانی و دۆستان و لایەنگرانی یەكێتی نیشتمانی كوردستان
ئەمڕۆ كوردستان لە دۆخێكی هەستیار و چارەنووسسازدایە، هاوڵاتیان بۆ داكۆكی لە مافە رەواكانیان بەشێوەیەكی مەدەنی و لەڕێی شەقامەوە داوای خواستەكانیان دەكەن، ئێمە وەك مەكتەبی رێكخستنی یەكێتی نیشتمانی كوردستان پشتیوانی لە تەواوی خواستە رەواكانیان دەكەین كە بە شێوازێكی هێمنانە و مەدەنیانە بێت، بۆیە پێویستە ئێوەش ڕۆڵی كاریگەرتان هەبێت بە ئاراستەی هێمنی شەقام، چونكە لەتوندوتیژیدا ڕەوایی داواكانی هاوڵاتیان وون دەبێت، بۆیە ڕایدەگەیەنین: پشتیوانیی خەباتی مەدەنیانەی هاوڵاتیانین لە شەقام، بەڵام دژی توندوتیژین بە هەموو جۆرەكانیەوە، دەركەوت توندوتیژی شەهیدبوون و برینداربوونی هاوڵاتیانی بەدوادا دێت، بۆیە داواكارین هەموو لایەك ئارامی بپارێزن و تەقەكردنیش وەكو سەرپێچیەكی گەورەی یاسایی مامەڵەی لەگەڵدا بكرێت و تەقەكەرانیش ڕوبەڕوی یاسا بكرێنەوە.
داواكارین هێزە ئەمنیەكان بەڕۆڵی كاریگەری خۆیان هەڵبستن و هێمنی و ئاسایشی تەواو بۆ هاوڵاتیان دابین بكەن.
PM:02:14:11/10/2015