پەرلەمانتارێکی کورد لە پەرلەمانی عێراق داوا لە سەرکردە کوردەکان دەکات نەبنە کەواسووری بەر لەشکری رێکخستنەوەی عێراق.
هۆشیار عەبدوڵا سەرۆکی فراکسیۆنی گۆڕان لە پەرلەمانی عێراق لەنووسینێک بە ناونیشانی " بازاڕە شێواوەکە ئاسایی مەکەنەوە" دەڵێت" ماڵ وبازاڕە شێواوەکەی عیراق کە کۆمەڵێک بازرگانی سیاسی کردویانەتە فەوزا و وێرانە لە ئێستادا لە خراپترین بارودۆخدایە".
ناوبراو دەڵێت" ئیدی رۆژانی داهاتوو سەرکردەی سیاسی و سەرۆکی پەرلەمان وخەڵکانی تریش دێن بۆ ئەوەی کورد رۆڵ بگرێت جارێکی تر بازارەکەیان بۆ رێکبخەنەوە و عەیامێكی تریش دزی و دەسەڵاتیان بەردەوام بێت".
سەرۆکی فراکسیۆنی گۆڕان بە دوری نابینێت زۆر بەرپرس و لایەنی کوردی ببنە کەواسوری بەر لەشکری رێکخستنەوەی ئەو بازاڕی تاڵانی و ئەو دەسەڵاتە مافیاییەی عێراق و، دەڵێت" لێکچونەکانی ئێرە و ئەوێ هێندە زۆرن حەز ناکەن قەت لێیان تێک بچێت، تا هاوشێوە و خراپتر لە خۆشیان لە گەندەڵی هەبێت".
هۆشیار عەبدوڵا پێیوایە "ئەوانە بە درۆ خەمی هەرێم و مافی چارەنوس و راپرسی و ئایندەی کوردیانە کە چی لە ۲٠٠۳ ەوە تا ئێستا عار نانێن و هەموو جارێک دەبن بە بەشێک لە رێکخستنەوەی ئەو بازارە وێرانەی عیراق . تەبعەن لە ژێر دروشمی درۆینە و پڕ شەرمەزاری ( کورد دەبێت بە شێکبێت لە چارەسەر )، باشە ئەگەر کورد کێشەی نیە و بەشێکە لە چارەسەر لە ۱۹۲٠ ەوە تا ئێستا ئەو هەمو شۆرش وشەهید و ماڵوێرانیەمان لە عیراقدا بۆ بەسەر هات .!؟بەدەست دوکانی سیاسی کوردی و سیاسی بازرگانەوە ،چەند نەتەوەیەکی مایە پوچین خودایە! ".