ژنە پەرلەمانتاری كوردی ئێزیدی، ڤیان دەخیل لەگەڵ چەند هاوڵاتی كورد‌و عێراقی لە فرۆكەخانەی ئیستانبول گیریان خواردوە‌و ناتوانن بگەڕێنەوە.

لەمبارەوە ڤیان دەخیل، بە ماڵپەڕی باسنیوزی راگەیاند، کە لەگەڵ ژمارەیەک هاووڵاتیی کورد و عێراقی، لە فڕۆکەخانەی ئیستەنبوڵ گیری خواردووە و بەهۆی نەبوونی گەشتی ئاسمانی، ناتوانێ بگەڕێتەوە وڵات.

ڤیان دەخیل ئاماژەی بەوەش دا، کە ئەو نەشتەرگەری بۆ کراوە و باری تەندروستی خراپە.

هاوكات ئەمرۆ شەممە عەبدولحوسێن عەبتان، وەزیری گواستنەوەی عێراقی بە وەکالەت لە بەیاننامەیەکدا رایگەیاندووە، کە وەزارەتەکەی چەند فڕۆکەیەکی ناردووەتە تورکیا، بۆ هێنانەوەی ڤیان دەخیل و ئەو هاووڵاتییە عێراقییانەی بەهۆی رووداوەکانی شەوی رابردووە، ناتوانن لە شوێنی خۆیان جووڵە بکەن و بگەڕێنەوە.

عەبدولحوسێن عەبتان ئاماژەی بەوەش داوە، کە فڕۆکەکان لە فڕۆکەخانەی بەغداوە بەڕێکەوتوون بۆ فڕۆکەخانەکانی ئەنتاڵیا و ئیستەنبوڵ، بۆ هێنانەوەی ئەو عێراقییانە بە هاووڵاتییانی هەرێمی کوردستانیشەوە.