بەبۆنەی یادی عاشووراوە، لە پارێزگای کەربەلا سێ ڕۆژ کرا بە پشووی فەرمی و لەو پارێزگایە تا هەینی پشوو دەبێت، ئەمەش لە کاتێکدایە وەزارەتی ئەوقافی هەرێم ڕۆژی سێشەممەی بە ١٠ی موحەرەم داناوە و کردوویەتییە پشووی فەرمی لە هەرێمی کوردستان

نسەیف خەتاب، سەرۆکی ئەنجوومەنی پارێزگای کەربەلا لە لێدوانێکیدا بۆ میدیاکان ڕایگەیاند ، ئەنجوومەنی پارێزگای کەربەلا بڕیاریدا رۆژانی سێشەممە، چوارشەممە و پێنجشەممەی ئەم هەفتەیە پشووی فەرمی بێت لە تەواوی دامودەزگاکانی پارێزگای کەربەلا.

ئەمەش لە کاتێکدا دێت مەریوان نەقشبەندی، وتەبێژی وەزارەتی ئەوقاف ڕایگەیاند ڕۆژی سێشەممە ١٠ی موحەرەمە و ئێمە ئەو ڕۆژەمان بە ئەنجومەنی وەزیران وتووە، کە ساڵانە لەو ڕۆژەدا دەکرێتە پشووی فەرمی.

هاوکات حکومەتی عێراق ڕۆژی چوارشەممەی وەک ١٠ی موحەرەم دیاری کردووە و لەسەرتاسەری عێراقدا ئەو ڕۆژە دەبێتە پشووی فەرمی لە دامەزراوەکانی سەر بە حکومەتی عێراقدا، کە چەند فەرمانگەیەکیش هەیە لە هەرێمی کوردستان سەر بە بەغدایە.