وەزارەتی پێشمەرگە کە لەژێر هەژموونی پارتی دیموکراتی کوردستاندایە، رێگا لە کەناڵی NRT دەگرێت، بچێتە بەرەی شەڕ، "بەڵام چاوپۆشی لەکەناڵەکانی خۆی دەکات".
کەناڵی NRT لە هەواڵێکدا بڵاویکردەوە " تەنها چەند کاتژمێرێک دوای ئەوەی وەزارەتی پێشمەرگە و هەموو لایەک سوپاسی کەناڵی ئێن ئاڕ تیان کرد، کە بەبێ جیاوازی رووماڵی سەرجەم بەرەکانی شەڕی کردووە، کەچی بەبیانوی ئەوەی دوو میوان لە پەخشی راستەوخۆدا هەستی پێشمەرگە و خانەوادەی شەهیدانیان بریندارکردووە، وەزارەتی پێشمەرگە بڕیاریدا، ڕێگە بە تیمی ئێن ئار تی نەدات ڕووماڵی بەرەكانی شەڕ بکات".
NRT جەخت لەوەدەکاتەوە " بڕیاری رێگریکردن لە چوونی تیمەکانی ئێن ئار تی لە لایەن وەزارەتی پێشمەرگەوە لە کاتێکدایە، کەناڵی کوردستان ٢٤ی مەسرور بارزانی کوڕی بارزانی و کەناڵی روداوی نێچیرڤانی بارزانی برازای بارزانی سەر بە پارتی زانیاری ورد لەسەر شوێنی هیزەکانی پێشمەرگە بڵاودەکەنەوە و کە هەندێکیان خزمەت بە داعش دەکەن".
بەپێی زانیارییەکانی سپی، سەرەتای کێشەی نێوان NRT و پارتی لە ١٠/١٧ ەوە دەستپێدەکات کاتێك کە لەکۆنگرەی رۆژنامەگەری بارزانیدا دوای ئازادکردنی چەند گوندێکی ناوچەی خازر، پەیامنێری کەناڵەکە لە کاتی پرسیارەکەیدا لە بارزانی وەک سەرۆک ناوی نەهێنا ئەمەش بووە مایەی نارەزایەتی پارتی و بەکەناڵەکەش راگەیەندراوە.
وەزارەتی پێشمەرگە لە راگەیاندراوێکدا ئاماژەی بەوەکردووە، لەبەرنامەیەکی راستەوخۆی کەناڵی ئێن ئاڕ تیدا، هەریەک لە عەدنان عوسمان پەرلەمانتاری پێشووی پەرلەمانی کوردستان و کەمال رەئووف ڕۆژنامەنوس، بێ ڕێزییان بە پێشمەرگە کردووە و بەو هۆیەوە هەستی پێشمەرگە و خانەوادەی شەهیدان بریندار كراوە و خەڵكی كوردستانیان نیگەران کردووە.
ئاماژەی بەوەشکردووە، بڕیاریاندا ڕێگە بە پەیامنێر و وێنەگرەكانیانی ئێن ئاڕ تی نەدەن، بۆ ڕووماڵكردنی شەڕ بچنە بەرەكان و نزیكی سەنگەرەكانی پێشمەرگە بكەون.
ئەو کەناڵە روونیدەکاتەوە " بڕیارەکەی وەزارەتی پێشمەرگە دوای ٥ کاتژمێر هات لەوەی بەرپرسی راگەیاندنی وەزارەتی پێشمەرگە بە ناوی هێزی پێشمەرگەوە سوپاسی کەناڵی ئێن ئاڕ تی کرد و رایگەیاند، ئێن ئاڕ تی بە درێژایی ئۆپراسیۆنەکە لەگەڵ هێزەکانی پێشمەرگەدابوون و ڕووماڵی سەرکەوتنەکانی پێشمەرگەیان بە باشی کردووە، وتیشی ئەوان لە وەزارەتی پێشمەرگە و هێزەکانی پێشمەرگە تەقدیری هەوڵ و ماندووبوونەکانی ئێن ئاڕ تی دەکەن".