ژمارەیەک بەرپرسی بالآی باڵی ناوەندی بڕیاری یەکێتی سەردانی هێرۆ ئیبراهیم دەکەن بەمەبەستی رێکخستنەوەی نێو ماڵی یەکێتی.

سەرچاوەیەکی بەشداربووی کۆبوونەوەکە بە سپی راگەیاند ئەو کۆبوونەوەیە بەمەبەستی رێکخستنەوەی ماڵی یەکێتی و چاکسازیە لە ریزەکانیداو دوای هاتنەوەی هەردوو جێگریش کۆبوونەوەی ئەندامانی مەکتەبی سیاسی و سەرکردایەتی بە بەشداری هەردوو باڵ سازدەکرێت.

لەو کۆبوونەوەیەدا کە جگە لە هێرۆ ئیبراهیم و بافڵ تاڵەبانی، هەریەک لە قادر حەمە جان و مەحمود سەنگاوی و شێخ جەعەفەر مستەفا و جەمیل هەورامی و حامی حاجی غالی شالآو کۆسرەت و جەلال کەریم و بەکر مستەفا، بەشداریان کردووەو لەسەر پرسەکانی نێو یەکێتی و چاککردنی پەیوەندی نێوان هێرۆ ئیبراهیم و بەرهەم ساڵح گفتوگۆیان کردووە.

لەو کۆبوونەوەیەدا بڕیار دراوە دوای گەڕانەوەی کۆسرەت رەسوڵ لە لەندەن و بەرهەم ساڵح لە دەرەوەی ولآت، کۆبوونەوەی مەکتەبی سیاسی بە بەشداری هەردوو باڵ و دواتر کۆبوونەوەی سەرکردایەتی سازبکرێت.

ئەو کۆبوونەوەیە هیچ پەیوەندی بە کۆبوونەوەی دوێنی ژمارەیەک لە مەکتەبی سیاسی و سەرکردایەتی باڵی زۆرینەوە نییە کە لە بینایەی مەکتەبی سیاسی لە سلێمانی کۆبوونەوە و لەسەر پرسەکانی ناوخۆی یەکێتی و پەیوەندیەکانیان لەگەڵ گۆڕان و پارتی کۆبوونەوەیەکی راوێژکاریان ئەنجامدا.