کۆمەڵێک چالاکوان و رۆژنامەنووسی شاری رانیە داوا دەکەن ئیدارەی راپەرین هەڵوەشێتەوەو، پێیانوایە " لەبری گەلی كوردستان، چەند حزب و بنەماڵە و خێڵێك بەرهەمی ڕاپەڕین و ئەو خوێنە دەخۆن كە بۆ سەرخستنی ڕژا".
لە بەیاننامەیەکی کۆمەڵێک گەنجی چالاکوانی مەدەنی و رۆژنامەنووسی رانیە کە بەناونیشانی " دوای 26 ساڵ خیانەت لەئامانجەكانی ڕاپەڕین بوەستێنن " بەبۆنەی یادی راپەرینی ساڵی ١٩٩١ەوە بڵاوکراوەتەوە کە لە ٣/٥ دا سەرەتا لە رانیە دەستیپێکرد و هەموو شارەکانی کوردستانی گرتەوە، پێیانوایە بەداخەوە دوای تێپەڕبونی زیاتر لەچارەگە سەدەیەك بەسەر ڕاپەڕینی 5ی ئاداری 1991دا، خیانەت و دوركەوتنەوە لەو ئامانج و دەستكەوتانە ڕو لەهەڵكشانە كە راپەڕینی لەپێناودا كرا. لەبری گەلی كوردستان، چەند حزب و بنەماڵە و خێڵێك بەرهەمی ڕاپەڕین و ئەو خوێنە دەخۆن كە بۆ سەرخستنی ڕژا. لەمڕۆدا لەبری دامەزراوەی شەرعی و دەستور و یاسا، دەسەڵاتێكی حزبی خۆسەپێن و خێڵەكی حوكم دەكات، كە بەردەوام خەریكی دەست تێكەڵكردنە لەگەڵ دوژمن و نەیارانی كوردستان".
لەو بەیانەدا کە کۆپیەکی دەست سپی کەوتووە، تیایدا هاتووە" لە دەرئەنجامی ئەو سیاسەتە چەپەڵە كە حوكمی كوردستانی پێدەكرێت، سەرجەم خەڵكی كوردستان و شار و شارۆچكە جیاوازەكان بە ئاستی جیاواز زەرەرمەند بوون، بەڵام ڕەنگە پشكی شێری پەراوێزخستن و ئەو زەرەمەندبوونە بەر شاری ڕانیە و ناحیەكانی و ئەو دەڤەرە بكەوێت كە ڕاپەڕین لێیەوە سەریهەڵدا، بەجۆرێك لە دوای ڕپەڕینەوە كەمترین خزمەتگوزاری لە بوارەكانی رۆشنبیری، پەروەردەیی، زانستی، ڕێگاوبان و ئاوەدانكردنەوە، گەشتیاری و ژینگەیی، تەندروستی، پیشەسازی و سەرجەم بوارەكانی تر لە دەروازەی ڕاپەڕیندا ئەنجامدراوە، هەربۆیە لە ئێستادا دەڤەرەكە لە ناوچەیەكی وێران و پاشماوەی جەنگێكی كاولكار دەچێت".
لە بەییانەمەکەدا دوو داوا دەخەنە روو" یەكێك لە ئامانجە سەرەكییەكانی ڕاپەڕین بریتیبوو لە بوونیادنانی حكومەت و ئیدارەی دیموكراسی و دامەزراوەیی، لە چوارچێوەی دەستور و یاسای مۆدێرندا، نەوەك حوكمی حزبی و تاكەكەسی و خێڵەكی كە ئیشی كودەتا و فەرهوودكردنی سامانی نیشتیمانی بێت لەپێناو بەرژەوەندی خۆیدا. بۆیە دەبێت هەرچی زووە ئەو دۆخە ناهەموارە كۆتایی پێبهێندرێت، ئەگەرنا خەڵكی كوردستان چۆن بە ڕاپەڕین پاداشتی زوڵم و زۆری بەعسی دایەوە ئاواش ڕۆژێك حەق و حیساب لەگەڵ ئیوەشدا دەكات".
دوای دووەمیشیان " پەیوەست بە دەڤەرەكەمان، داواكارین بە زووترین كات ئیدارەی ڕاپەڕین هەڵبوەشێندرێتەوە، چونكە لەبنەڕەتدا بۆ خۆڵكردنە چاوی خەڵك و كۆكردنەوەی دەنگ و لەبیربردنەوەی داواكاری بەپارێزگابوون هەڵچنراوە. لە ڕۆژی دامەزراندنیشیەوە هیچ پاڵپشت و چوارچێوەیەكی یاسایی نیە و، تائێستاش هیچ ئاڵوگۆڕێك لەو ستافەدا نەكراوە كە بەڕێوەی دەبەن وە جگە لەو ستافە هیچ كەسێكی تر خێری لە ئیدارەكە نەبینیووە، بەڵكو بۆتە هۆی زیادكردنی ڕۆتینیات و بێسەرەوبەرەیی ئیداری و تێكەڵبوون و ناڕوونی یاخوود ونبوونی بەرپرسیارێتی ئەو هەموو گەندەڵی و كەموكوڕی و كەمتەرخەمییە زۆرانەی كە لە دەڤەرەكەدا بوونیان هەیە. بۆیە داواكارین بەزووترین كات ئەو بەناو ئیدارەیە هەڵبوەشێتەوە، لەبری ئەوە پێویستە ڕانیە بكرێت بە پارێزگا، چونكە سەرجەم مەرج و پایەكانی بەپارێزگابوونی لە هەندێك لەو شوێنانە زیاترە كە ئێستا وەك پارێزگا مامەڵەیان لەگەڵدا دەكرێت، یاخوود هیچ نەبێت شارەكە بكرێتەوە بە قەزا هاوشێوەی ساڵانی پێشوو".