ئەندامێکی سەرکردایەتی پارتی ڕایگەیاند لەم هەفتەیەدا چەند كۆبوونەوەیەكی گرنگ لەبارەی كاراكردنەوەی پەرلەمان ‌و پرسی ڕیفراندۆم لەنێوان گۆڕان ‌و یەكێتی لەلایەك ‌و یەكێتی ‌و پارتی لەلایەكی دیكە دەكرێن.

د. ئاراس حەسۆ میرخان، ئەندامی سەركردایەتی پارتی دیموكراتی كوردستان بە ڕووداوی راگەیاندووە، لەم هەفتەیەدا چەند كۆبوونەوەیەكی گرنگ لەنێوان یەكێتی ‌و گۆڕان لەلایەك ‌و یەكێتی ‌و پارتی لەلایەكی دیكە دەكرێن، سەرجەم كۆبوونەوەكانیش بۆ كاراكردنەوەی پەرلەمان ‌و پرسی ئەنجامدانی ڕیفراندۆم دەبن.

سەرکردەکەی پارتی لەبارەی پێشنیازی كاراكردنەوەی پەرلەمان ‌و گەڕانەوەی د. یوسف محەممەد، سەرۆكی پەرلەمان بۆ دانیشتنێك ‌و پێدانەوەی پۆستی سەرۆكی پەرلەمان هەر بە بزووتنەوەی گۆڕان، ئاماژەی بۆ ئەوە کردووە کە ئەوە پێشنیازی یەكێتی بووە. وتوشییەتی: "چاوەڕێ دەكەین بزانین كۆبوونەوەكانی ئەمجارە چ ئەنجامێکیان دەبێ، بەڵام بۆ سەركەوتنی ڕیفراندۆم پارتی هەموو كارێك دەكات".

ناوبراو ڕاشیگەیاندووە کە ڕیفراندۆم لەكاتی دیاریكراوی خۆیدا (25-9-2017) هەر دەكرێت. و هەموو هەوڵێكیان بۆ ئەوەیە بزووتنەوەی گۆڕانیش بەشداری ڕیفراندۆمەکە بکات.