بەڕێوەبەرایەتی گشتیی تەندروستی دهۆك ئاشکرایکرد لە ماوەی سێ‌ ساڵی رابردوودا زیاتر لە دوو ملیۆن ئاوارە سەردانی نەخۆشخانەكانی دهۆكیان كردووە و بەگشتی ٨٨١ ئاوارە لە نەخۆشخانەكان گیانیان لە دەست داوە.

دكتۆر نزار عیسمەت بەڕێوەبەری گشتیی بەڕێوەبەرایەتی تەندروستی دهۆك لە پرێس کۆنفرانسێکدا وتی، لە ماوەی سێ‌ ساڵی رابردوودا دوو ملیۆن و 392 هەزار و 826 ئاوارە سەردانی بنكە و نەخۆشخانەكانی سنووری پارێزگای دهۆكیان كردووە و لەو ژمارەیە 881 ئاوارە لە نەخۆشخانەكان گیانیان لە دەست داوە.

ڕاشیگەیاندووە "لەو ماوەیەدا 15 هەزار و 130 نەشتەرگەری بۆ ئاوارەكان ئەنجام دراون و 74 هەزار و 450 ئاوارە لە نەخۆشخانەكانی دهۆك لەسەر قەرەوێلەكان خەوێنراون، هەموو ئەو هاوكارییانەش لەلایەن حكوومەتی هەرێمی كوردستان و وەزارەتی تەندروستی بووە و هیچ هاوكارییەكی پێویست لەلایەن حكوومەتی عێراقەوە نەكراون، ئەمە لە كاتێكدایە كە بەشێكی زۆری ئەو ئاوارانە لە مووسڵ و ناوچەكانی سەر مووسڵ هاتوون ، جگە لەو ئاوارانەی كە لە شنگال ، زومار، رەبیعە و تلكێف و شوێنەكانی ترەوە هاتوون.