پەرلەمانتارێکی عێراق ڕایگەیاند له‌ لایه‌ن وه‌زاره‌تی بازرگانی عیراقه‌وه‌ پێیان راگه‌یه‌ندراوه‌ كه‌ ته‌واوی پاره‌ی گه‌نمی جووتیارانی هه‌رێم بۆ ساڵی 2017، ره‌وانه‌ ده‌كه‌ن، به‌ڵام هێشتا پاره‌ی گه‌نمی ساڵه‌كانی 2014 و 2015 و 2016 یان ماوه‌ وه‌ری بگرن.

ئه‌شواق جاف، ئه‌ندامی ئه‌نجومه‌نی نوێنه‌رانی عیراق له‌ فراكسیۆنی پارتی دیموكراتی كوردستان بە ماڵپەڕی وێستگەی وتووە: له‌ لایه‌ن وه‌زاره‌تی بارزگانی عیراقه‌وه‌ ئاگاداركراونه‌ته‌وه‌ كه‌ پاره‌ی گه‌نمی جووتیارانی هه‌رێم سه‌د له‌ سه‌د خه‌رج ده‌كرێت.

ڕوونیشی کردووەتەوە "به‌ڵام هێشتا جووتیارانی هه‌رێمی كوردستان به‌شێك له‌ پاره‌ی گه‌نمی ساڵه‌كانی 2014 و 2015 و 2016یان وه‌رنه‌گرتووه‌، له‌ كاتێكدا جووتیارانی عیراق پاره‌ی ته‌واوی 2014 و سه‌دا 50ی پاره‌ی 2015 و سه‌دا 63ی 2016یان وه‌رگرتووه‌، به‌ڵام جووتیارانی هه‌رێم هێشتا له‌چاو جووتیارانی عیراقدا زۆر كه‌متریان وه‌رگرتووه‌".

باسی لەوەشکردووە: له‌به‌ر ئه‌وه‌ به‌غدا پاره‌ی ساڵی 2017ی جووتیارانی هه‌رێم ده‌دات، چونكه‌ پاره‌كه‌ كه‌م بوو، هه‌روه‌ك زۆربه‌ی جووتیارانیش گه‌نمه‌كه‌یان به‌ عه‌ره‌به‌ بازرگانه‌كان فرۆشت و متمانه‌یان به‌ حكومه‌تی عیراق نه‌بوو كه‌ پاره‌ی گه‌نمیان بداتێ كه‌ تا ئێستا هی سێ ساڵ پێش ئێستایان وه‌رنه‌گرتووه‌.