پارێزگاری لەسەر کارلادراوی کەرکوک دەڵێت، "بارزانی وازی لە پۆستەكەی نەهێناوە، بەڵكو ماوەكەی كۆتایی هاتووە، بۆیە ئەمە شتێكی ئاساییە كە ئەنجامی داوە".

نەجمەدین كەریم، ئه‌ندامی مه‌كته‌بی سیاسی یه‌كێتی نیشتمانی كوردستان و پارێزگاری لەسەر کارلادراوی کەرکوک لەمیانی چاوپێکەوتنێکیدا لەگەڵ كه‌ناڵی سی ئێن ئێن-ی ئه‌مریكی لەبارەی دەستبارداربونی بارزانی لە پۆستی سەرۆکایەتی هەرێم رایگه‌یاندوە:" بارزانی وازی لە پۆستەكەی نەهێناوە، بەڵكو ماوەكەی كۆتایی هاتووە، بەڵێنیشی بە گەلەكەی دابوو كە بەردەوام نابێت لەسەر پۆستەكەی و ناشیەوێ ماوەكەی درێژتر بكرێتەوە، بۆیە ئەمە شتێكی ئاساییە كە ئەنجامی داوە".

وتیشی، بارزانی ئاڵای ریفراندۆمی سەربەخۆیی بەرز كردەوە و ریفراندۆمەكە بە شێوەیەكی زۆر ئاشتیانە و سەركەوتوو بەڕێوەچوو، بەڵام بە داخەوە پەرچەكرداری عیراق و وڵاتانی دراوسێ دڵڕەقانە بوو، لەگەڵ ئەوەشدا خەونی سەربەخۆیی هێشتا زیندووە، ئێستاش بێگومانم دەوڵەتی سەربەخۆی كوردستان هەر دروست دەبێت، زووتر لەو كاتەش كە هەندێك كەس بیری لێ دەكەنەوە".

لەبارەی روداوەکانی کەرکوک و دەوروبەری نەجمەدین كەریم ئاماژەی بەوەدا، كەركووك داگیر كراوە، بەڵام رزگاری دەكەینەوە.