بەرپرسێكی نەتەوە یەكگرتووەكان، لە بەرامبەر بەرزبوونەوەی ئاستی دەستدرێژیی سێكسی لە عێراق هۆشیاری دەدات.
جینیفەر كو ئیموند، كە یەكێكە لە بەرپرسانی سندووقی نەتەوەیەكگرتووەكان بۆ دانیشتوان، ئەمڕۆ چوارشەممە لە راپۆرتێكدا دەڵێ "ئێمە و ئەو كەسانەی لە بواری مرۆیی كار دەكەن، بەرپرسیارێتیمان لەسەرە لە رێگرتن لە دەستدرێژی و بەكارهێنانی سێكس لە عێراق".
جیا لەمەیش كو ئیموند دەڵێ "لە عێراق مەترسی خراپ بەكارهێنانی سێكس و دەستدرێژیی سێكسی لە بەرزبوونەوە دایە، بە تایبەتی لە كاتی تەنگەژە و ململانێیەكان".
تۆڕی عێراق كار بۆ پاراستنی هەردوو رەگەز دەكات لەبەرانبەر دەستدرێژیی سێكسی، لە سەرۆكایەتی ئەم تۆڕە هەر یەكە لە سندوقی یوئێن بۆ دانیشتوان و پرۆگرامی خۆراكی جیهان و چەندان رێكخراوی تر كار دەكەن، بۆ ئەوەی سنوورێك بۆ ئەو دیاردەیە دابنێن.
ماوەی دوو مانگە سندوقی نەتەوە یەكگرتووەكان بۆ دانیشتوان بە سپۆنسەری تۆری PESA كار دەكەن بۆ راهێنانی چالاكوانەكانیان لە بواری مرۆیی لە سەرانسەریی عێراق، بۆ ئەوەی رێگریی لە دەستدرێژیی سێكسی بكەن، كە دەكرێتە سەر هەردوو رەگەز.