سەرۆكی لیژنەی سووتەمەنی لە ئەنجوومەنی پارێزگای سلێمانی دەڵێت، كۆمپانیای "قەیوان"بەنزینی لە مەرزی پەروێزخانەوە هێناوەتە سلێمانی كە هۆكاری سەرەكییە بۆ نەخۆشی شێرپەنجە.

غالب محەمەد سەرۆكی لیژنەی پیشەسازی و وزە لە ئەنجوومەنی پارێزگای سلێمانی وتویەتی لە ماوەی چەند ڕۆژی ڕابردوو بڕێكی زۆر بەنزین لەلایەن كۆمپانیای قەیوانەوە لە مەرزی پەروێزخانەوە هاتووەتە سلێمانی كە بەنزینێكی خراپ و نەگونجاوە بۆ ئۆتۆمبێل و بە تایبەتیش بۆ تەندروستی هاووڵاتییان شیاو نییە.

ڕاشیگەیاندووە ئەو بەنزینە لە سنووری پەروێزخان پشكنینی بۆ كراوە و دوای ئەوە دەركەوتووە كە مادەی "بێنزینا"ی زۆرە و مەترسیدارە بۆ تەندروستی مرۆڤ بە تایبەت هۆكاری نەخۆشی شێرپەنجەیە، چەند ڕۆژێك لە مەرزەكە ڕێگە نەدراوە ئەو تەنكەرانە بێنە ناو خاكی هەرێمی كوردستان، بەڵام دواتر بە فێڵ ڕێگە بە تەنكەرەكان دراوە و هاتوونەتە سلێمانی و بەنزینەكە فرۆشراوە"

لە لێدوانێکیدا بۆ وشە وتوشیەتی بەو مادەی بێنزینایە كە لە بەنزیندا هەیە، نابێت لە پۆینت هەشت زیاتر بێت، بەڵام بەنزینەكەی قەیوان 2.2 بووە و مادەی (بێنزینەكەی) كە زۆر مەترسیدارە، بۆیە دەبوو قەیوان خۆی ڕێگەی نەدایە بەو بەنزینە بێتە ناو شارو بفرۆشرێت، چونكە ئەو بەنزینە تەنانەت كەڵكی نییە تێكەڵی بەنزینی تریش بكرێت و دەبوو ڕەوانەی ئێران بكرایەتەوە.