پەرلەمانتارێكی عیراق كە بەلێدوانە سەیر و سەمەرەكانی ناسراوە، لەبارەی نوێژە بارانەوە توێتێكی جیاواز بڵاودەكاتەوە.
فائیق شێخ عەلی ئەو ئەندامەی ئەنجومەنی نوێنەرانی عیراق كە بەوەناسراوە لێدوانی نامۆ و سەیروسەمەرە دەدات، ئەمجارەشیان تویتێكی نامۆ لەبارەی پێشكەشكردنی یاسایەك بڵاودەكاتەوە بۆ رێگریكردن لە ئەنجامدانی نوێژە بارانە لەوڵات.
فائیق شێخ عەلی لەتویتێكیدا كە لەتۆڕی كۆمەڵایەتی تویتەر بڵاویكردۆتەوە و پێدەچێت وەك تەنزێك بڵاویكردبێتەوە لەبەرامبەر ئەو زیانە زۆرەی بەهۆی لافاوەوە روویداوە، دەڵێت: لافاو وڵاتی كوەیت و شاری بەسڕە و چەند شارێكی تری باشوری عیراقی گرتۆتەوە و زیانی گەورەی بەدوای خۆیدا هێناوە.
دەشڵێت، بەهۆی زیانەكانی ئەو لافاوەوە، پەرلەمانتارانی كوەیت لەوڵاتەكەی خۆیان و پەرلەمانتارانی بەسڕەش لەعیراق سەرقاڵی پێشكەشكردنی پرۆژەیاسایەكی پێشنیازكراون بۆ دیاریكردنی سزا بۆ ئەو ئیمام و مەلایانەی پێشنوێژی نوێژە بارانە دەكەن و سزاكەشی لەسێدارەدان بێت تامردن.
ئەو تەنزەی ئەو پەرلەمانتارە دوای لێدوانەكانی پارێزگاری بانكی ناوەندی عیراق دێت كە رایگەیاندبوو: بەهۆی لافاوەوە زیاتر لە7 ملیار دیناری عیراق لەناوچوون.