ئەنجومەنی باڵای سیاسی و بەرژەوەندی یەكێتیی راگەیەندراوێكی بڵاوكردەوە

ئەمڕۆ پێنجشەممە، ئەنجومەنی باڵای سیاسی و بەرژەوەندی یەكێتی یەكەم كۆبونەوەی خۆی لە دوای كۆنگرەی چوارەمی یەكێتیی ئەنجامدا و ڕایگەیاند"  لەم دۆخەدا، ئاكامی شكستی حكومەتەكانی عێراق، كێشەی چەشناوچەشنی دەستوری و ئابوری و سیاسی لەعێراقدا، پەنگیان خواردووە".

 

لە ڕاگەیەندراوەکەدا ئاماژە بەوەشکراوە" هەرێمی كوردستان پێویستی بە پرۆژەیەكی نوێی دانوستان و چارەسەری دەستوری و ئابوری و سیاسی هەیە؛ هێزە كوردستانیەكانیش، لەبەرامبەر روداوەكانی ناوچەكەدا، ئەركمانە ناكۆكی حیزبایەتی كەم بكەینەوەو ئەركە هاوبەشە گشتیەكان بكەینە ستراتیژی قۆناغەكە".

 

دەقی راگەیەندراوەکە:

راگەیاندنی ئەنجومەنی باڵای سیاسی و بەرژەوەندیی یەكێتی

 

گەلی ئازادیخوازی كوردستان!

 

كەسوكاری شەهیدان!

 

هەڤاڵانی یەكێتی!

 

دەنگدەرە بەئەمەكەكانی یەكێتیەكەی مام جەلال!

لە هەلومەرجێكدا، قەیرانە ئابوریەكانی جیهانگیری، بەتایەتی سیاسەتی سودگەرایی لیبرالیزمی نوێ دەسەپێنرێ، كێشەی گەلان زیاتر پەراوێز دەخرێ‌، جیاوازی كۆمەڵایەتی درێژەی هەیە و لەشكری بێكاری.. زۆرتر دەبێ.. و سەرئەنجام، بۆ یەكەمین جارە لەمێژوودا، هاوزەمان لە ئەمریكای لاتین، رۆژهەڵاتی ناوەڕاست، وڵاتانی ئاسیا.. بۆ دژایەتی گەندەڵی و بەدیهێنانی دادپەروەری، راپەڕین بەرپا دەكرێ و ستەمكارەكان، یان دەڕوخێن، یاخود لەبەردەم داخوازی راپەڕینەكاندا، پاشەكشە دەكەن.

 

لەم دۆخەدا، ئاكامی شكستی حكومەتەكانی عێراق، كێشەی چەشناوچەشنی دەستوری و ئابوری و سیاسی لەعێراقدا، پەنگیان خواردووەو هەرێمی كوردستان پێویستی بە پرۆژەیەكی نوێی دانوستان و چارەسەری دەستوری و ئابوری و سیاسی هەیە؛ هێزە كوردستانیەكانیش، لەبەرامبەر روداوەكانی ناوچەكەدا، ئەركمانە ناكۆكی حیزبایەتی كەم بكەینەوە و ئەركە هاوبەشە گشتیەكان بكەینە ستراتیژی قۆناغەكە..

 

لەو بارودۆخەدا، كە هێشتا مەترسیەكانی داعش، بەتاكتیكی رەشەكوژی پارتیزانی لەئارادایەو پێشمەرگەش، گیان لەسەردەست كوردستان و حكومەتەكەیان دەپارێزن، لەدوای كۆچی رابەری هەڵكەوتومان سەرۆك مام جەلال، بە ئامادەبونی (1126) نوێنەری ئۆرگانەكان، بەپێی ئەو بەرنامەیەی كۆمیسۆنی باڵای ئامادەكاری كۆنگرە و كۆمیتەی پەیڕەوی ناوخۆ، گەڵاڵەیان كردبوو، یەكێتیی چوارەمین كۆنگرەی سازدا.

 

دڵنیاین، دۆست و نەیاران، لەپێشەوەیاندا كادرو ئەندامە پەرۆشەكانی یەكێـتی و پێشمەرگە دلێرەكان، چاودێریی چۆنیەتی بەستنی كۆنگرەكەیان دەكرد. بۆ؟ چونكە دۆخی سیاسی، گۆڕانكاریی كۆمەڵایەتی، كێشە ئابوری و سیاسەیەكان، فشاریان لەسەر ژیانی حیزبایەتی و چۆنیەتی چارەسەركردنی گرفتەكان هەبوو. سەرئەنجام، بە بەرنامەیەكی گونجاو سەبارەت بە كێشەو پێكهاتەی یەكێتی، لەناو سیستەمێكی نایابی بەڕێوەبردنی كۆنگرەدا، كاتژمێر (11)ی رۆژی (21/12/2019) كۆنگرە، بە خوێندنەوەی راپۆرتی كۆمسیۆنی باڵای ئامادەكار لە لایەن حاكم قادرەوە و پاشان، بە خوێندنەوەی راپۆرتی سیاسیی جێگری سكرتێری گشتی، هەڤاڵ كۆسرەت رەسوڵ عەلی، دەستیپێكرد. ئینجا، رێوشوێنی چۆنیەتی هەڵسەنگاندنی راپۆرتی سیاسی و پەیڕەوی ناوخۆ، خرایە دەنگ و چۆنیەتی هەڵبژاردنی (ئەنجومەنی باڵای سیاسی بە سەرۆكایەتی هەڤاڵ كۆسرەت رەسوڵ عەلی) بۆ پاراستنی بەرژەوەندی و پەیڕەوی ناوخۆ و هەڵبژاردنی (ئەنجومەنی گشتی یەكێتی) تێكڕا پەسەندكران. پاشان، دەرگای خۆپاڵاوتن، كرایەوە.

 

ئەنجومەنی باڵا، لەكاتێكدا، سوپاسی ئەندامانی كۆنگرەو كۆمسیۆنی ئامادەكار و لیژنەی پەیڕەوی ناوخۆ، هەروەها پارێزەرانی ئەمنی هۆڵەكە، بۆ ماندووبونیان دەكات.. هاوكات، لە یەكەمین كۆبونەوەی ئەمڕۆیدا بنچینەی سیاسەتی خۆی، بۆ راپەڕاندنی ئەركەكانی كە كۆنگرە پەسەندیكردون، دیاری كردو لەماوەیەكی كورتدا لەڕێی لیژنەی هاوبەشی ئەنجومەنی باڵاو ئەنجومەنی گشتیشەوە، دەسەڵاتەكانی لە پەیڕەوی ناوخۆدا، هەروەكو لەكۆنگرەدا بڕیاری لێدرا، دەچەسپێنرێ؛ لە كۆبونەوەكەدا جەخت كرایەوە، كە دەستەبەری سیاسەت و بەرژەوەندیی یەكێتی دەبێ، لەهەموو ئاست و ئاراستەكاندا. دوا تواناشی دەخاتەكار، ئۆرگانەكان، پابەندی بڕیارەكانی كۆنگرەو رێبازی یەكێتی و سەرۆك مام جەلال بن، كە رێبازی دادپەروەری رەنجدەرانی بیروبازووە؛ رێبازی كوردایەتی مافی چارەی خۆنوسینە بۆ سەرانسەری كوردستان؛ رێبازی مافی مرۆڤ و ژینگەپارێزی و یەكسانی ژن و پیاوە..

 

جەماوەری كوردستان!

 

ئەنجومەنی باڵا، سور دەبێ لەسەر جێبەجێكردنی بڕیار و بەرنامەكانی كۆنگرە. لەڕێی جێبەجێ كردنی بڕیارەكانی كۆنگرەشەوە، یەكێتی، لە حكومەتی عێراق و كوردستاندا، دەتوانێ داكۆكی راستەقینە بكات لە چارەسەركردنی كێشەكانی خەڵك. لەپێشەوەدا، كێشە ئابوریەكان. هەتا كێشە ئابوریەكانی خەڵكیش، لەپێشەوەدا موچە و و بودجە، هەروەها دانەوەی پاشەكەوتی موچەخۆران، چارەسەرنەكرێ و پرۆژەكان نەخرێنەوە كار.. بانكەكان متمانە وەرنگرنەوەو قەرزی سەرمایەداران نەدرێتەوە.. یەكێتی ناتوانێ، جەماوەر ئاشت بكاتەوەو ئاشتی كۆمەڵایەتی و لێبوردەیش، ناچەسپێنرێ.

 

لە سەردەمێكی نوێی جیهانگیری و هەژمونی سۆسیال- میدیادا، لەدوای چوارەمین كۆنگرەوە، یەكێتی پێ دەنێتە قۆناغێكی نوێی حیزبایەتی و ململانێی سیاسی و كۆمەڵایەتیەوە. لەكاتێكدا ئەركمانە، یەكڕیزی هێزە سیاسیەكان و دۆستایەتی پشتیوانەكانمان، پەرە پێبدەین، ناشبێ‌، جیاوازی رێبازی فەلسەفەی سیاسی و كۆمەڵایەتیشمان بە سیاسەتێكی ئەقڵانی، وەكو حیزبێكی سۆسیال-دیموكرات، گەش دەرنەخەین. یەكخستنی هێزە سیاسیەكان و رێكخستنی ململانێ كۆمەڵایەتیەكان، تایبەت لە بۆتەی خەباتی پیشەیی و جەماوەری و مەدەنیدا، بنچینەی ئەركە دیموكراسیەكانن، لەم قۆناغەی گوزەری دیموكراسیدا، بەرەو سیستەمی دیموكراسی راستەقینەو دادپەروەری كۆمەڵایەتی و خۆشگوزەرانی.

 

ئیتر بۆ پێشەوە بەرەو بەدیهێنانی ئەركەكانی چوارەمین كۆنگرە

-نەمری بۆ شەهیدان

سەركەوتن بۆ خەباتی چارەخۆنوسینی نەتەوەكان

-بێتەدی دیموكراسی و خۆشگوزەرانی و دادپەروەری

 

ئەنجومەنی باڵای سیاسی و بەرژەوەندی

یەكێتیی نیشتمانیی كوردستان

26/12/2019



ئه‌م بابه‌ته ‌1188 جار خوێنراوه‌ته‌وه‌‌

PM:06:39:26/12/2019