بەڕێوەبەری تەندروستی سلێمانی رایدەگەیەنێت" رێكکاری نوێ بۆ رێگرتن لە بڵاوبونەوەی ڤایرۆسی كۆرۆنا دەگرینەبەر، نمونەی پشكنینی ڤایرۆسی كۆرۆنا لەكارمەندی (دوكان، ماركێت، نانەواخانە و سەمونخانەكان)ی پارێزگای سلێمانی وەردەگرین".
دكتۆرسەباح هەوارامی، بەڕێوەبەری تەندروستی سلێمانی لە ڕێی پەیامێكەوە كە لە پەڕەی تایبەت بە خۆی لە فەیسبووك بڵاوی كردۆتەوە رایگەیاند" بۆ دڵنیایی زیاتر و رێگرتن لەبڵاوبوونەوەی زیاتری ڤایرۆسی كۆرۆنا نمونەی پشكنینی ڤایرۆسی كۆرۆنا لەكارمەندی دوكان و ماركێت و نانەواخانە و سەمونخانەكانی پارێزگای سلێمانی وەردەگیرێت".
ئەم راگەیەندراوەی بەڕێوەبەری تەندروستی سلێمانی لە دوای ئەوەیە كە لە ئێستادا بازاڕەكان بە گشتی بەهۆی نەخۆشی ڤایرۆسی كۆرۆناوە داخراون، بەڵام ماركێت و نانەواخانە و دوكانی كۆڵانەكان كراوەن بۆ دابنیكردنی پێداویستی رۆژانەی هاووڵاتیان.
ئەمە لەکاتێکدایە، بەپێی دواین ئامار، لەهەرێمی کوردستاندا (٤٧) کەس تووشی ڤایرۆسی کۆڕۆنای نوێ COVID-19 بوون، لەنێویاندا (١) مردن هەیە و (١٣) نەخۆش بەتەواوی چاکبوەتەوە و ئەوانیتر هەمویان لەژێر چاودێری پزیشکیدان.