نێچیرڤان بارزانی سه‌ردانی له‌نده‌ن ده‌كات
لە لێدوانێكی تایبەتدا بۆ ماڵپەری فەرمیی حكوومەتی هەرێمی كوردستان، سامی ئه‌رگۆشی سكرتێری ڕۆژنامه‌وانیی نێچرڤان بارزانی سه‌رۆك وه‌زیرانی هەرێمی كوردستان ڕایگەیاند:
ئەمڕۆ یەكشەممە 18ی مایسی 2014 شاندێكی حكوومەتی هەرێمی كوردستان لەسەر داوەتی فەرمیی حكوومەتی بەریتانیا بە سەرۆكایەتیی نێچیرڤان بارزانی و بەشداریی هەریەكە لە د. ئاشتی هەورامی وەزیری سامانە سروشتیەكان، د. عه‌لی سندی وه‌زیری پلاندانان، قوباد تاڵەبانی بەرپرسی فەرمانگەی هەماهەنگی و بەدواداچوون له ئه‌نجومه‌نی وه‌زیران، سەفین دزەیی گوتەبێژی فەرمیی حكوومەت، فەلاح مستەفا بەرپرسی فەرمانگەی پەیوەندییەكانی دەرەوەی حكوومەت و ژماره‌یه‌ك له ڕاوێژكاران، بەرەو لەندەنی پایتەختی بەریتانیا بەڕێ ده‌كه‌ون.
شاندی حكوومەتی هەرێمی كوردستان هەردوو ڕۆژانی دووشەممە و سێشەممە لەگەڵ ژمارەیەك لە وه‌زیران و بەرپرسانی حكوومەتی بەریتانیا كۆ دەبنەوە و تیایدا وێڕای پەیوەندییەكانی نێوان هەرێمی كوردستان و بەریتانیا، چەندین تەوەری دیكەی گرنگ باس دەكرێت كە پەیوەندیی بە بواری بازرگانی و هاریكاریی وزە و بەرەوپێشبردنی پەیوەندییەكان لە هەموو ڕوویه‌كه‌وه هه‌یه.
PM:02:09:18/05/2014