ئاسایشی پارێزگای هه‌ولێر دەستگیرکردنی چوار كه‌سی به تۆمه‌تی بازرگانیكردن به (چه‌ك و ده‌رمان و هێلكه)ی قاچاغ ڕاگەیاند.
له‌راگه‌یه‌ندراوێكدا، دژه تیرۆری كوردستان بڵاویكرده‌وه، له درێژه‌ى هه‌وڵى بنبڕكردنى ديارده‌ى هه‌ر كارێكى ناياسايى و قاچاغ، له هه‌فته‌ى رابردوو چوار كه‌س له‌لايه‌ن به‌ڕێوه‌به‌رايه‌تى ئاسايشى هه‌ولێر ده‌ستگير كران وه‌ك له خواره‌وه ئاماژه به ناوه‌كانيان و ورده‌كارييه‌كان دراوه:
لە شه‌وى (10 له‌سه‌ر 11-9-2020)، كه‌سێك به‌ناوى (ئيبراهيم سه‌ردار حه‌سه‌ن) – دانيشتووى شارى هه‌ولێر – گه‌ڕه‌كى مامزاوه كه كارى كڕين و فرۆشتنى هێلكه ده‌كات، ده‌ستگير كرا به تۆمه‌تى هه‌وڵى هێنانە ناوەوەى بڕى (84) کارتۆن هێلكه‌ى قاچاغ بۆ شارى هه‌ولێر لە رێگاى بازگه‌ى هيران – شه‌قڵاوه به ئۆتۆمبێلى جۆرى بارهه‌ڵگر ژماره (192771/هه‌ولێر).
له رێكه‌وتى (13-9-2020)، كه‌سێك به‌ناوى (ئارام عه‌ونى كه‌ريم) – دانيشتووى شارى هه‌ولێر – گه‌ڕه‌كى ژيان – پيشه: پۆليس ده‌ستگيركرا به تۆمه‌تى هه‌وڵى هێنانه ناوه‌وه‌ى بڕى (7) كيسه‌ى گه‌وره‌ى كرێم و مه‌رهه‌مى كۆزماتيكى قاچاغ و ماوه به‌سه‌رچوو بۆ شارى هه‌ولێر لە رێگاى بازگه‌ى دێگه‌ڵه‌وه.
له رێكه‌وتى (14-9-2020)، دوو كه‌س له‌لايه‌ن به‌ڕێوه‌به‌رايه‌تى ئاسايشى هه‌ولێره‌وه ده‌ستگير كران به تۆمه‌تى كارى قاچاغچيێتى چه‌ك به‌ناوه‌كانى:
أ- (مسته‌فا سه‌عيد محه‌مه‌د حه‌مه‌د ئه‌مين)، ناسراو به حاجى هه‌رووتى – دانيشتووى هه‌ولێر- گه‌ڕه‌كى هه‌ولێرى نوێ – له ماڵه‌كه‌يدا ده‌ستگيرا به‌سه‌ر 1250 دانه ده‌مانچه‌ى توركى قاچاغ.
ب- (سه‌ڵاح به‌هرام تاهير حه‌سه‌ن)، دانيشتووى هه‌ولێر – گه‌ڕه‌كى كورانى رێگاى مه‌خموور – پێشه: پێشمه‌رگه‌ى خانه‌نشينى يه‌كه‌ى (70)، له ماڵه‌كه‌يدا ده‌ستگيرا به‌سه‌ر 10 دانه ده‌مانچه‌ى توركى قاچاغ.
ئێمه وه‌ك دژه تيرۆرى كورستان دووپاتى ده‌كه‌ينه‌وه، كه به هاوبه‌شى له‌گه‌ڵ به‌ڕێوه‌به‌رايه‌تييه‌كانى ئاسايش له چاودێريكردن و به‌شوێنداچوونى ديارده‌ى هێنانى ده‌رمان و خۆراكى قاچاغ و ماوه‌به‌سه‌رچوو و هه‌ر كارێكى ناياسايى كه زيان به ته‌ندروستى هاووڵاتيانى هه‌رێمى كوردستان و ئابوورى و ئاراميى هه‌رێم بگه‌يه‌نێت، به‌رده‌وام ده‌بين و هه‌موو رێوشوێنێكى ياسايى ده‌گرينه‌به‌ر بۆ بنبڕكردنى ئه‌م ديارده‌يه.