تكایەكی برایانە..

بەناوی خوای بەخشندەی میهرەبان

بەڕێزان.. بەرپرسی یەكەم و سەركردایەتی هەر پێنج حیزبە پێكهێنەرەكەی حكومەتی هەرێم..

بەڕێزان.. بەرپرسانی سەرجەم حیزبەكانی كوردستان..

پاش سڵاو و ڕێز و نرخاندنی كۆشش و ماندووبونەكانتان.. رەمەزان لە هەموو لایەك پیرۆز دەكەم..

ماوەیەكە خۆم لە لێدوان و بەشداری سیاسی دوورخستووەتەوە و لەدوورەوە قسەیەكی خێرم پێ بووبێ كردوومە، بەڵام ئەمڕۆ دەمەوێ ئەو بێدەنگییە بشكێنم و راشكاوانە بە نازی متمانەو دۆستایەتی و برایەتی و هاوخەباتی بیست ساڵی رابردوومان ئەم نامە كراوەیەتان پێشكەش بكەم، لەم كەناڵە گشتییەوە بێت تا ڕای گشتی و چالاكوانانی مەدەنی و راگەیاندكاران لێی بەئاگابن و هاوكار بن، هەروەك ئامادەیی خۆشم بۆ هەر ئەركێك لەم بوارەدا رابگەیەنم..

بەڕێزان.. ئەوەی من دەیبینم خەریكە كەشتی هەرێمەكەمان بەرەو لێواری نادیاری و هەڵدێر دەچێ، قەیرانی ئابوری بەگشتی و، بازاڕ و موچەو بژێوی هاوڵاتیان بەتایبەتی لەبەردەم هەڕەشەدایە..

هەڕەشەی ئەمنی و شەڕی تیرۆر و داعش و ناسەقامگیری ئیداری و ناكارایی دەزگاكان پێكەوە دەست لەملان بوون لەگەڵ دۆخە داراییەكەدا..

مامەڵە لەگەڵ بەغدا و گرفتی خوێندنەوەی جیاواز لە نێوانی هەرێم و بەغدا لە بەرامبەر شتدا، (لە دەستورەوە تا فرۆشتنی نەوت و، پێشمەگەو، مادەی 140 و...) كێشەیەكی وا ئاڵۆز بووە كە ئەگەری هەموو شتی خراپی لێ بەدوور نابینرێت..

لەگەڵ ئەم حاڵەتەشدا ململانێی حیزبی و دابەشبوونی سیاسی و قەیرانی نەبوونی متمانەو چەند گوتاری و چەند هەڵوێستی لەمەڕ كێشەو گرفتە نیشتیمانی و گشتییەكاندا بەسەختی سەری هەڵداوەتەوەو، بەڕای من ناوماڵی كورد و كوردستان لە هەڵوەشاندنەوەدایەو، سیاسیەكان و راگەیاندنەكان بەڕای من مامەڵەی نادروست دەكەن لەگەڵ قەیرانەكان بەتایبەت ئەم پرسە درەنگ وەختەی دوایی..

ئەگەر شەڕی ناوخۆ و لوولەی تفەنگ بەدوور بێ، بەڵام جیایی و ناكۆكی حیزبە سیاسیەكان لە ئاستێكی وادایە كە لەباربردنی هەموو دەستكەوتەكان و سەروەرییەكانی گەل و دوبارە دابەشبوونەوەی هەرێم لە دۆخەكەوە بەدوور نابینرێ، ئەم دابڕان و ناتەبایی و چەند بۆچوون و دەربڕینە جیاوازانە بەدوور لە مێزی كۆبوونەوەو گفتوگۆ و دانوستان مەترسیدارە و، هەریەكە لە بورجی سەركردایەتی خۆیەوە بڕیارێك ئەدا و، سەرئەنجام كارەسات روودەدات و هەموو بەرەوپێشچوونەكانمان دەچنەوە خاڵی سفر و، رەنج بەخەساری روو ئەكاتە هەموو لایەك، ئەمەش بەرپرسیارێتییەكی مێژوویی گەورەیە لە ئەستۆی هەمواندا..

لە هەموو دونیا و لە هەموو سەردەمێكدا كێشەو قەیران روویداوەو، كۆمەڵگەی مرۆیی بێ كێشەو گیروگرفت نابێ، بەڵام هونەری ئیدارەی قەیران گرنگەو سەلیقەی خاوكردنەوەو بەئاراستەی چارەسەردا بردنی مەسەلەی بنەڕەتییە و مەرجی سەركەوتوویی سەركردەكانە، بەداخەوە لەئەزموونی بیست و چوار ساڵەی فەرمانڕەوایی و حاڵەتی سیاسی هەرێمدا بینیمان، هەموو هەنگاوەكانی چاكسازی و چارەسەرەكان لە مەیدانی عەمەلیدا گەرماوگەرم ئەنجام نادرێن و، زەمەن هەمیشەو بەردەوام بەفیڕۆ ئەدرێ و، كێشەو گرفتەكان بێ چارەسەری ریشەیی بەجێ دەهێڵرێن تا بۆگەن ئەكەن، ئینجا هەوڵی چارەسەری دەرهاویشتە شكڵییەكان دەدرێ..

بەڕێزان.. ئێستە و دوور لە كێشە كۆن و ریشەییەكانی دارایی و ئەمنی و ئیداری، هەرێم و ئەزمونە سیاسیەكەی لەبەردەم قەیرانێكی نوێدایە.. ئەویش پرسی سەرۆكایەتی هەرێمە كە وەك لوغمێك هێڵراوەتەوەو دواخراوەو بەجێ هێڵراوە، گوایە بە هەمواركردنەوەی پرۆژەی دەستور چارەسەر بكرێت، ئاشكرایە نە كات بەشی ئەوە ئەكات و نە مەسەلەكەش ئەوەندە سادەو ساكارە، بۆیە چارەسەری پەلەپڕوزێ و كاری ئیسعافی ناتوانێ فریای بكەوێ..

ئەم پرسە لەم دۆخە ناسكە پڕ لە كێشەیەدا بەم تایبەتمەندییەی ئێستایەوە، لە هەموو كێشە درێژخایەن و قەیرانەكانی تر هەستیارترەو، بە بۆچوون و خوێندنەوەی بەندە ئەم پرسە (لوغم)ە نەك (باڵۆن)ی سیاسی، تەحەمولی یاری پێكردن و مناوەرە لەسەر كردن ناكات، بەڵێ لوغمەو دەبێ بەشێوەیەكی هەندەسی چارەسەر بكرێ، ئەگەرنا ئەگەری تەقینەوەی تێكدەرانەو خولقاندنی دۆخێكی نەخوازراوی هەیە، هەروەك ئەگەر دڵسۆزانە بەرپرسیارانە دەستی بۆ ببرێت، دەبێتە سەرەتای قۆناغێكی نوێ لە ئاشتەوایی نیشتیمانی و تۆكمەكردنی ناوماڵی كورد و پتەوكردنی یەكڕیزی و پشتگیری حكومەتی بنكە فراوان و دەستپێكی هەڵمەتێكی چاكسازی جددی و ریشەیی..

بۆیە تكاتان لێ ئەكەم:

لە نزیكەوە بەدوور لە حەز و هەستی تاكە شەخسی و بەرژەوەندی حیزبی و، تەنیا لەبەر خاتری خوداو خەڵكی ستەمدیدەو فیداكاری كوردستان و وەفای خوێنی شەهیدان و فرمێسكی بێنازانی ئەم گەلە لێقەوماوە، كە ئێوە بەرپرسن لە چارەنوسی ئەمڕۆ و ئاییندەی، بەرپرسانە لیژنەیەكی بڕیار بەدەست و راسپێردراو لە هەر پێنج حیزبەكە پێك بهێنن و بەخێرایی ئەم پرسە یەكلایی بكەنەوە، بەڵكو لەم رەمەزانە پیرۆزەدا مژدەی رێكەوتن و چارەسەر بدەن بە هاوڵاتیان و، ئاشتەواییەكی كۆمەڵایەتی راستەقینە بەرپا بكەن، تا یەكچاو ببنەوە بۆ روبەڕوبوونەوەو چارەسەری كێشەو قەیرانەكانی تر..

پرۆژەكانتان هەموو جێگای رێزن، بەڵام بەبێ رێكەوتنی سیاسی هەمووان، پەرلەمان ناتوانێ یەكلایی بكاتەوە، دەبێت هەموو لایەك مەرج و داواو خاڵە بایەخدارەكانی خۆی لە كۆبوونەوەی ئەو لیژنەیەدا بخاتە روو، بە دانوستان بگەنە ئەنجامێكی گونجاو، دوور لە سەپاندن و تاكڕەوی، ئەنجا پێكەوە داوا لە پەرلەمان بكەن (تەكییف)ی یاسایی و (تەخریجە)ی گونجاو بۆ ئەو بڕیارە بدۆزێتەوە، پەرلەمان بە پاڵپشت بەو رێكەوتنە سیاسیە لە دوو سەعاتدا ئەتوانێ یاسای سەرۆكایەتی هەموار بكاتەوە و ئەم سەرئێشەیە لەم قۆناغە ناسكەدا لەكۆڵی خۆتان و گەلەكەمان بكەنەوە..

هەمووان چاوەڕێی هیممەتی جوامێرانەتانین..