(یەکێتیی)و داهێنانی پرانسیپی (فرەیی)
بۆ ڕێگرتن لەدووبارەبوونەوەی ئەزموونی سیستەمی تاکڕەویی و کارنەکردن بەسیستەمیێک کەلەسەر بنەمای ناوەندێتییەکی تۆکمەی باڵادەست بنیاتنرابێت و لەسەرەوە شۆڕبووبێتەوە بۆ خوارەوە، بەو چەشنەی کە لەناو ڕیزەکانی (پارتی)و لەقۆناغی (شۆڕشی ئەیلول) دا؛ پەیڕەوکراو ئاکامی خراپی لەسەر سیستەمی کاری سیاسیی و چۆنیەتیی سەرکردایەتییکردنی شۆڕشی ئەیلوولدا لێکەوتەوە؛ (یەکێتیی) لەدەسپێکی دامەزراندنییەوەو بۆ قۆناغی (شۆڕشی نوێ)، پرانسیپێکی نوێی داهێنا بۆ بەڕێوەبردنی (یەکێتیی)و (شۆڕشی نوێ)، ئەویش پرانسیپی (فرەیی)، لەبواری گرتنەخۆی چەند ڕێکخراوێکی جیاواز؛ لەڕووی ئایدیۆلۆژیی و دروشم و پرانسیپ و دیدو جیهانبینیی و پێکهاتەی کۆمەڵایەتیی جیاوازو ناجۆرەوە .
لەئەزموونی (یەکێتیی)دا؛ چ لەقۆناغی (مەشرووعییەتی شۆڕشگێڕیی)، واتە قۆناغی (شۆڕشی نوێ) و خەباتی چەکداریی، چ لەقۆناغی (مەشرووعییەتی یاسایی)، واتە قۆناغی دوای ڕاپەڕینی ساڵی (١٩٩١)و وردتر لەهەڵبژاردنی پەرلەمانی کوردستان، لەساڵی (١٩٩٢)ەوە؛ ئەتوانین بڵێین پرانسیپی (فرەیی)، تا ئێستا چەندین دەرئەنجامی باشی لەدوای خۆی بەجێهێشتووەو بووەتە یەکێک لەپایەکانی دیموکراسیی و ئازادیی و پێکەوەژیان، لەهەمانکاتدا دەرهاویشتەیەکی خراپیشی لای بەشێک لێکەوتۆتەوە بۆ پراکتیزەکردنی (فرەیی) بەهەڵە، بەناوی (دەستەگەریی)!.
دیاردەی دەستەگەریی لەناو (یەکێتیی)
(یەکێتیی) لەساڵی (١٩٩٢)داو لەکۆنگرەی (١)ی خۆیدا، بەفەرمیی بڕیاری یەکگرتنی (کۆمەڵە،شۆڕشگێڕان،هێڵی گشتیی)ی دا، لەدوای ئەو کۆنگرەیەوە (یەکێتیی) بوو بەیەک ڕێکخراو.
هەرچەندە دیاردەی دەستەگەریی، لەڕابردووداو لەسەرەتاکانی (کۆمەڵە)و لەقۆناغی (شۆرشی نوێ)شدا؛ لەناو ڕیزەکانی (کۆمەڵە)دا سەریهەڵدابوو؛ بەڵام ئامانجەکەی جیاوازتربوو، لەئامانجی دیاردەی دەستەگەریی دوای کۆنگرەی یەکەم، دەستەگەرەکانی پێشووی ناو (کۆمەڵە)، گووزارشتی لەبنەمای ئایدیۆلۆژیی و دیدو جیهانبینیی جیاواز ئەکرد، بەڵام گرووپە دەستەگەرەکانی دوای کۆنگرەی (١)؛ نە لەدوور، نە لەنزیک؛گووزارشتی لەبنەمای ئایدیۆلۆژیی و دیدو جیهانبینیی جیاواز نەکردوەو ناکات.
لەدوای کۆنگرەی (١)ەوە؛ وردە وردە دیاردەی دەستەگەریی، لەسەر بنەمای بەرژەوەندیی و ململانێ لەسەر دەسەڵات و پێگەو هەژموون؛ نەشوونمای کردو لای بەشێک لەسەرکردەکان بووە ئەلتەرناتیڤ و میکانیزمەی درێژەپێدانی پرانسیپی (فرەیی ڕێکخراوەکان)، لە(یەکێتیی) پێش کۆنگرەی (١)و دیاردەی دەستەگەریی جیهانبینیی ئایدیۆلۆژیی جیاواز، لەناو (کۆمەڵە)ی جاراندا.
دیاردەی دەستەگەریی؛ لەم (٢٤) ساڵەی ڕابردوودا، چەندین قۆناغی بڕی و زیانی گەورەی لە(یەکێتیی)داو باجەکەی قوورس کەوتەوە، هەروەها دیاردەی دەستەگەریی؛ بەیەکێک لەهۆکارە سەرەکییەکانی زۆرینەی ڕەهای کێشەو گرفت و قەیرانەکانی ناو (یەکێتیی) دائەنرێت، تەنانەت کاریگەریی خراپیشی لەسەر ئەدائی ئێمە لەحکومەت، لەناو جەماوەر، بگرە لەڕوودانی جیابوونەوەی (بزووتنەوەی گۆڕان)یشدا دروستکرد، چونکە ئەوانیش لەڕابردوودی ناو (یەکێتیی)یاندا؛ وەکو بەشی جیاجیا تێوەگلابوون بەدیاردەی دەستەگەریی.
ئەفسووس تائێستا دەستەگەریی درێژەی هەیە، بەدڵنیایی ئەگەر کێشەو ناکۆکیی و ململانێکانی گرووپە دەستەگەرەکان؛ بنەڕەتییانە چارەسەر نەبن، ئەوا وەکو نەخۆشییەکی شێرپەنجەیی و کووشندەی مەترسیداری بەردەوام؛ ئەمێنێتەوەو زیاتریش تەشەنەئەسەنێت، دەرهاویشتەی نەخوازراوو خراپتری لێئەکەوێتەوە، هەروەک چۆن لە(٢٤) ساڵی دوای هەڵوەشانەوەو یەکگرتنەوەی ڕێکخراوەکانی ناو (یەکێتیی)دا، ئەم (یەکێتیی)ەی ئێمە؛ تووشی چەندین کێشەو گرفت و قەیران بۆتەوە، هەر لەئەنجامنەدانی کۆنگرەکان لەکاتی ئاسایی خۆیانداو نەبوونی هەر (٣) کۆنگرەی پێشوو؛ بەوێستگەیەک بۆ ڕیفۆرم وهەڵوێستەکردن و بەخۆداچوونەوەو نوێبوونەوەی (یەکێتیی)و نەدۆزینەوەی چارەسەری گوونجاو و بنەڕەتیی بۆ کێشەو گرفت و قەیرانە ئۆرگانیی و ڕێکخراوەییەکان، دواتر بەهۆی بەشدارییمان لەپرۆسەی فەرمانڕەوایی؛ تووشی تێوەگلان بووین؛ بەگەندەڵیی و نادادپەروەریی و خراپ بەکارهێنانی دەسەڵات، لەسەردەستی چەندین لێپرسراوی باڵاو کادیری پێشکەوتووی ناو حکومەت، هاوشان بەشێک لەلێپرسراوو کادیرانی پێشکەوتووی ناو ئۆرگانەکانی (یەکێتیی)، هاوتەریب لەگەڵ بەشێک لەهەڤاڵەکانی ناو حکومەت؛ خەمەکانیان وەرچەرخا؛ لەخەمی ڕێکخراوەیی و نەتەوەیی و خەمی هێنانەدی ئامانجە گشتییەکانەوە، بۆ خەمە تایبەتیی و خۆییەکانی دەوڵەمەندبوون و پەیداکردنی هێزو هەژموون و پێگە؛ لەناو جوومگە بەهێزەکانی حکومەت و (یەکێتیی)، هەروەها بۆ تۆکمەکردنی دەسەڵاتی زیاترو کارکردن بۆ دروستکردنی گرووپی دەستەگەری تایبەت بەخۆیان؛ بەمەبەستی جێبەجێکردنی ئەجێندا تایبەتییەکانیان، لەپاڵیدا کارکردن بۆ مەبەستی هێنانە پێشەوەی ئەو کەسانەی کەلەسەر بنەمای پاشکۆیەتیی و بەرژەوەندیی، کەوتوونەتە ناو بازنەی خۆیانەوە، هەروەها کەنارگیربوونی ژمارەیەکی بەرچاو؛ لەکادیرو فەرماندەی سەربازیی و ئەندام، شانبەشانی دروستبوونی دابڕانی گەورەو بۆشایی فراوان، لەنێوان (یەکێتیی)و کۆمەڵگەی کوردیی لەهەرێمەکەماندا، لەگەڵ چەندین کێشەو گرفتی تری گەورەو کاریگەر، هەموو ئەمانە بەرهەمی دیاردەی دەستەگەریی بوو، لەهەمووی ئاڵۆزتر ؛بەردەوام دەستەگەریی بریتییبووە لەکۆسپ و ڕێگر، لەبەردەم پیاچوونەوەو لیپرسینەوەو گۆڕانکاریی و چاکسازیی و ڕوونیی و نوێبوونەو گەشەپێدان و چەسپاندنی دادپەروەریی ڕێکخراوەیی.
ئامانجی دەستەگەریی!
سروشت و ئەزموون و ئامانج و دەرهاویشتەکانی بەڕێوەبردنی ناکۆکیی و ململانێی گرووپە دەستەگەرەکانی ناو (یەکێتیی)، لە(٢٤) ساڵی ڕابردوودا؛ گرێدراوە بە(٢) فاکتەرەوە؛ یەکەمیان بەرژەوەندیی مەتریالیی، بەتایبەتیی لەدوای ساڵی (٢٠٠٣)ەوە ، دووەمیان زامنکردنی دەسەڵاتێکی بەهێزو تۆکمە؛ ئەویش بۆ پاراستن و گەشەپێدانی بەرژەوەندییە مەتریالییەکان و تێرکردنی غەریزەی مەتریالیی ، کەگوومانی زۆر هەیە بتواندرێت؛ ئەو غەریزەیە تێر بکرێت و تەواو دابمرکێنرێتەوە، لەهەمانکاتدا بۆ مسۆگەرکردنی پارێزبەندیی (حەصانە)یەک،هەروەها بۆ ئەوەی بتوانن ڕووبەڕووی هەموو ئەو فشارو گووشارانە ببنەوە، کەتووشیان ئەبێت، بەشێک لەو سەرکردانە، هەرگیز ئامادە نابن لەپۆستە باڵاکانیان بکشێنەوەو دەرفەت بدەن؛ بەنەوەیەکی تر لەدوای خۆیان؛ لەمسۆنگەیەوە دیاردەی دەستەگەریی، ئەبێتە ئەو قەوارە پیرۆزە؛ کەتیایدا بۆ ئامانجی ڕەوانەوەی خەمە تایبەتییەکان، دەستەگەرەکان خۆیانی تیا؛ تەییارو سازو ڕێکئەخەن؛ قەوارەکەشیان ڕتووش ئەکەن بەبابەتی خەمە گشتییەکان!
جەماوەر چی لە(یەکێتیی) ئەوێت؟
(یەکێتیی) لەم دۆخەدا، هەر گیرۆدەی کێشەو قەیرانە ناوخۆییەکانی گرووپە دەستەگەرەکان نییە، بەڵکو گیرۆدەی ژمارەیەک کێشەو قەیرانی کۆمەڵگەی کوردییشە، جەماوەری (یەکێتیی) و بەشێکی فراوان لەچین و توێژەکان ، خوازیارن کە (یەکێتیی) ببێتەوە بەهێزە سەرەکیی و کاریگەرەکەی جاران، بۆ گەیشتن بەکەناری ئارام؛ ئامادەن ئومێدو هیوای ڕزگاربوون لەگرفت و قەیرانەکان، لەسەر (یەکێتیی)و هاوپەیمانە جیابووەکەی (بزووتنەوەی گۆڕان) هەڵبچنن، بەڵام بەکام (یەکێتیی)؟
بەدڵنیایی ئەو (یەکێتیی)ەی کەزۆرینەی ڕەهای سەرکردەکانی لەڕابردوودا، لەناو (یەکێتیی)دا؛ خاوەنی هیچ پرۆژەو ئەجێندایەکی تایبەتیی نەبوون، هیچ هێڵێکی کشانەوەو پاشگەزبوونەوەو سازانێکی ناڕەواو نالۆژیکییان نەخستبووە پێشچاوو بەردەمی خۆیان، (یەکێتیی)یان نەکردبووە؛ قوربانیی بەرژەوەندیی و ئەجێندە تایبەتییەکان و مساوەمەیان لەسەر نەکردووە!
(یەکێتیی)و سەرکردەکان؛کامیان چارەنووسی بەئەوی ترەوە گرێدراوە؟
ئەگەر سەرکردەکانی (یەکێتیی)؛ بیانەوێت هەموو وزەو تواناکان بخەنەوە بۆتەی خەباتکردن؛ بۆ ماف و خەم و ئامانجەکانی کۆمەڵگەی کوردیی و (یەکێتیی) بکەنەوە بەهێزە کاریگەرو داینەمۆکەی جاران؛ (یەکێتیی) ئێستاش چەندین فاکتەرو بنەمای بەهێزی تیا ماوە بۆ بووژانەوەو بەهێزبوون، بەڵام ئەجێنداو بەرژەوەندییە تایبەتییەکانی بەشێک لەسەرکردەکانمان، کۆسپ و ڕێگرن، لەمڕووەوە پێویستە ئەجێنداو بەرژەوەندییە تایبەتییەکان وازلێبهێنرێت، تا چیتر زەمینەخۆش نەبێت بۆ شەقارشەقاربوون و بچووکتربوونەوە و پەراوێزبوونی زیاتری (یەکێتیی)!
ئەبێ سەرکردەکانی (یەکێتیی) بزانن، (یەکێتیی)ەکی بچووک؛ خۆیان و پێگەو بەرژەوەندییە تایبەتییەکانیشیان ئەخاتە بەردەمی چەندین مەترسیی و هەڕەشە، چیتر کۆمەڵگەی کوردیی؛ وەکو جاران لە(یەکێتیی) ناڕوانێت و چاوەڕوان ناکات، ئەگەر هەموو سەرکردایەتیی (یەکێتیی)؛ سەرکردایەتییەکی نابازرگان و ناموڵکدارو خاکیی و لەخۆبردوو و خەمخۆرو خزمەتکار نەبێت، جەماوەر ئامادە نییە متمانەکەی جاران بداتەوە بە(یەکێتیی)، ئیتر سەردەمی کارکردن لەسەر؛ زیندووکردنەوەی یادەوەریی، بووژانەوەی کەلەپووری سیاسیی ڕابردوو، بیرهێنانەوەی مێژووی شەڕو داستانەکان، گێڕانەوەی چیرۆکەکانی شانازیی و سەروەرییەکانی ڕابردوو بەسەرچوو؛ نۆستۆلۆژیا دادمان نادات و جێگایەک لەمێشکی خەڵکدا نەماوە، بۆ بەردەوام بەگوێدادانەوەی ئەو پەیامانە، بەتایبەتیی لای نەوەی نوێ.
ئایە هەموو سەرکردەکانی (یەکێتیی) ئامادەیی ئەوەیان تیایە ؛ دان بەهەڵەکاندا بنێن و ئیرادەی بەخۆداچوونەوەو ڕەخنەلەخۆگرتن و کارکردن بۆ بەرژەوەندیی و خەمی گشتیی، بکەنە ئەلتەرناتیڤی ئیرادەی بەرژەوەندیخوازیی، کەئێستا لای بەشێک لەسەرکردەکان بووەتە ڕێبازو (یەکێتیی)یان پێ گەیاندە ئەم ڕۆژە، (یەکێتیی)یان لەهێزێکی ڕێچکەشکێن و ئاراستەکەر و بڕیاردەرو خاوەن زیمامی ئموورو خاوەن دەستپێشخەرییەوە؛ کردە هێزێکی تەماشاکەرو نمایشکارو چاولەدەست !
(یەکێتیی) لەم قۆناغەدا؟
ئەپرسم لەقۆناغی ئەمڕۆی پڕ لەکێشەو قەیراندا، ئاسۆو ئاراستەو جیهانبینیی (یەکێتیی) بەرەو کوێ لەنگەر ئەگرێت، سیاسەتی (یەکێتیی) لەکوێدایەو بەتەمای چییە؟
هەر ئارامبگرین و چاوەڕێی دەستپێشخەریی بەرامبەرەکان بین؟، هەر پاڵ بنێین بەگالیسکەیەکەوە، کەئێمە ئاراستەی ناکەین و لەکاتی گەیشتن بەدوایین مەنزڵدا ، ئەوانی تر هەڵیبڕێژن بۆ خۆیان و ئێمەی لێ تەریک بین؟!
لەئێستادا بێجگە لەسەرکەوتن و قوربانیی و قارەمانیی هێزی پێشمەرگەو هێزی بەرەنگاربوونەوەی تیرۆر، لەشەڕی دژی دەوڵەتی ئیسلامیی خەلافەت ،کەبەری ڕەنجی ئەوەش؛ لەدەرەوەی (یەکێتیی) ئەچنرێتەوەو چنراوەتەوە، ئەبێ چی تر لەکوردستان و عێراقدا هەبێت؛ ئێمە بڵێین ئەها ئەوە ئێمەین و ئەها ئێمە ئەوەمان کرد بۆ ڕەوانەوەی خەمە گشتییەکان، بەڵام لەکارکردن بۆ ڕەوانەوەی خەمە تایبەتییەکان؛ کەم نین ئەوانەی کەبوونەتە خاوەنی دەستکەوت و غەنیمەی بێشوومار!
ئەم (یەکێتیی)ەی ئێمە خەریکی چییەو بەشداری چ پرۆسەیەکی سیاسیی کاریگەرو نەخشێنەرە؟، دەستکەوتەکان چین و کاریگەرییمان لەناو پرۆسەی سیاسیی و فەرمانڕەوایی عێراق و کوردستان چییە؟، ئەو بڕیارە گرنگانە کامانەن کەتیایدا بەشدارین؟، ئەو دۆسیە هەستیارو چارەنووسسازانە کامانەن کەئێمەش تیایدا بەشداریین لەبەڕێوەبردنیدا؟، ئەو ڕووداوو گۆڕانکاریی و پەرەسەندنە پۆزەتیڤانە چین، کەئێمە داینەمۆو دروستکەریی بووین، یان بەشداری ڕاستەقینە بووین تیایدا؟، ئەو پلانە سیاسییانە چین، کەئێمە بەشداری داڕشتنی بووین و پشکی دیارمان هەبووە، لەهەنگاونان بۆ جێبەجیێکردنی؟، ئایە (یەکێتیی) جاران وابوو؟!، ئایە پێویست ناکا (یەکێتیی) وەکو جارانی لێبێتەوە؟
مەخابن لەم ڕەوشەدا (یەکێتیی)؛ بۆتە هێزی سازدەری میهرەجان و نماییشکردن و کەرنەڤاڵ و یادکردنەوەو دابەشکردنی خەڵات و مەدالیاو بەرێوەبردنی بۆنەی پرۆتۆکۆلیی و کاری سۆشیال میدیایی و خۆخەریککردن بەجموجۆڵی لاوەکیی و ڕوواڵەتیی ، کەئەوانیش بەشێکن لەچالاکیی و ئەرکی رێکخراوەیی، بەڵام ئەرکی سەرەکیی نا، بەهەرحاڵ با لەمانە گەڕێین، بزانین بەشێک لەسەرکردەکانمان لەم قۆناغەدا سەرقاڵی چین؟!
یەک ناوەندی بڕیار؛بەڵام ڕەواو تەبا!
لەم بارودۆخەدا بەشێکی بەرچاو لەسەرکردەکانمان، لەڕێگەی گرووپە دەستەگەرەکانەوە؛ سەرقاڵن بۆ خستنەگەڕی هەوڵ و کۆششی زیاتر؛ لەپێناوی بەرژەوەندییە تایبەتییەکان و داشکانەوەی ڕێڕەووی (یەکێتیی)؛ بەلای گرووپی دەستەگەری خۆیاندا، ئەمە لەکاتێکدا ئەبووایە سەرکردەکانی (یەکێتیی)؛ لەم قۆناغە قەیراناووییەدا؛ فریادڕەس، داکۆکیکەری ماف، بەدیهێنەری داواکاریی ،هێزی چارەسەری کێشەو قەیرانە تەشەنەسەندووەکانی خەڵک، ڕەوێنەرەوەی خەمە گشتییەکان بوونایەو کاریگەریی و شوێندەستی دیاریان هەبووایە، لەسەر جوومگەو کایە بەهێزو دۆسیە گرنگەکان؟
(یەکێتیی) بۆ مانەوە، بۆ بووژانەوەو هەستانەوەی خۆی، بۆ ڕاستکردنەوەی هاوسەنگیی هێزو هاوکێشەکان، بۆ گەڕانەوە بۆ ڕۆڵ و کاریگەرییەکەی جاران؛ ئەبێت سەرکردەکانی بەرپرسیارانە؛ هەست بەهەستیاریی ئەم قۆناغە بکەن، پەرۆش بن و هەنگاوی ژیرانە بنێن، بۆ دۆزینەوەی چارەسەری گونجاو، بۆ کێشەو قەیرانەکان، (یەکێتیی)مان بۆ بکەنەوە، بەو هێزەی کە لەڕابردوودا بەوە ناسرابوو، خاوەنی سیاسەتی ڕاستەقینەی خۆی بوو، دووربوو لەهەموو جۆرە هەژموونێک، سیاسەتەکانی ڕاستەڕێ بوو؛ بۆ هێنانەدی ئامانج و خەم و مافەکانی خەڵک، بەڵام ئێستا هەمان ئەو خەڵکە، چیتر ئامادە نین؛ ئەو ڕێبازی کارکردن و ئەو ئاراستەی سیاسەتکردنەی بەشێک لەسەرکردەکانی (یەکێتیی)؛ بەم چەشنەی ئێستا پەسەند بکەن، کەتاکو هەنووکە بەپراکتیکیی و بەکردار، هیچ ئومێدو پەیامێکی دڵخۆشکەری بۆ چارەسەری قەیرانەکان و بۆ ڕزگاربوون لەو توونێڵە تاریکە داخراوە، کەپێمان خزێنراوەتە ناوی؛ لێ دەرنەکەوتووە، لەڕووداوێکی گەرماوگەرمیشدا؛ ئەفسووس جارێکی تر ململانێ و ناکۆکییەکان تەشەنەیسەندەوە، بۆ دابەشبوونی سەرکردایەتیی (یەکێتیی)، لەسەر بنەمای (زۆرینە)و (کەمینە)!
لەڕاستییدا کۆی سەرکردایەتیی گشتیی ئێستای (یەکێتیی)، لەمانگی (٦-٢٠١٣)ەوە، بەگوێرەی پرۆگرام و پەیڕەوی ناوخۆی کۆنگرەی (٣)ی ساڵی (٢٠١٠)، لەڕووی دەستووریی ئۆرگانیی و ڕێکخراوەییەوە؛ ڕەوایی نەماوەو بوونەتە سەرکردایەتییەکی کاربەرێکەری ماوە بەسەرچوو، بۆ ئەوەی ئێمە ببینە خاوەنی سەرکردایەتیی و ناوەندێکی بریاری بەهێزو کاریگەرو تەباو ڕەوا؛ دوور لەدەستەگەریی و هەوڵی هەژموون و پاوانخوازیی؛ بەبۆچوونی (بەندە)، چەندین هەنگاو هەیە، کەبەپێویستی ئەزانم بگیرێتەبەر، بەڵام گرنگەکانیان، ئەم خاڵانەی خوارەوەن:
١-هەڵوەشانەوەی هەموو گرووپ و دەستەگەرییەک ،کەلەناو (یەکێتیی)دا دروستبووە.
٢-داواکردن لەڕێکخراوی نێودەوڵەتیی سۆسیال ئەنتەرناسیونال؛ بۆ ناردنی کۆمیتەیەکی شارەزا، بەهاوکاریی گرووپێکی پسپۆری تایبەت بەچارەسەری قەیرانەکان، کە لەوڵاتانی ڕۆژئاوا هەیەو لەکاتی قەیرانەکاندا؛ داوای دۆزینەوەی چارەسەریان لێ ئەکرێت، تاکو بەوردیی چارەسەر بۆ کێشەو قەیرانەکانی (یەکێتیی) بدۆزنەوە.
٣-سازدانی کۆنگرەی چوار، بەچەند مەرجێک:
ێ-ئەوانەی خۆیان ئەپاڵێون بۆ ئەندامی سەرکردایەتیی؛ ئەبێت خۆیان و کەسە زۆر نزیکەکانیان بەدووربن لەکاروباری بازرگانیی و خاوەنداریی کۆمپانیا، نە بەئاشکرا، نە بەنهێنیی و نە بەدروستکردنی واجیهەو دەمامک بۆ خۆیان!
ب-ئەوانەی دەرئەچن بەئەندامی سەرکردایەتیی، بۆیان نەبێت لە(٣) خوولی سەرکردایەتیی زیاتر خۆیان بپاڵێوون، ئەوانەشی کەتاکو بەستنی کۆنگرەی داهاتوو، زیاتر لە(٣) خولە؛ ئەندامی سەرکردایەتیی و مەکتەبی سیاسیین، تەنها بۆ (١) خوولی تر؛ مافی خۆپاڵاوتن و دەرچوونیان هەبێت.
ج-پرۆسەی هەڵبژاردنی ئەندامانی کۆنگرەوهەڵبژاردنی ئەندامانی سەرکردایەتیی لەکۆنگرەدا، لەژێر سەرپەرشتیی و چاودێریی کۆمیتەیەکی (ڕێکخراوی سۆسیال ئەنتەرناسیونال)دا بێت، کە(یەکێتیی) تیایدا ئەندامێکی سەرەکییەو بەرێز مامجەلالیش؛ تاکو ئێستا بەفەرمیی، یەکێکە لەجێگرەکانی سکرتێری گشتیی ئەو ڕێکخراوە نێونەتەوەییە، بانگهێشتی ئەو کۆمیتەیە بۆ ئەوەیە، تاکو پرۆسەی هەڵبژاردنی کۆمیتەی سەرکردایەتیی؛ بەدوور بێت لەدەستتێوەردان، هەروەها پەیڕەوی سیستەمی ئیلیکترۆنیی دەنگدان بکرێت، بۆ هەڵبژاردنی ئەندامانی سەرکردایەتیی.
د-لەناو کۆنگرەدا، ڕۆڵ و ئەرک و دەسەڵاتی زیاتر بدرێت، بە(ئەنجوومەنی ناوەند)و بەپراکتیکیی بکرێتە پەرلەمانی (یەکێتیی)، تاکو ژمارەیەک ئەرکی گرنگیی ڕووبەڕوو ببێتەوە؛ لەنموونەی ڕاپەڕاندنی بەشێک لەدەسەڵات و ئەرکەکانی سکرتێری گشتیی بەوەکالەت، بەتایبەتیی ئەو ئەرکانەی کەبڕیاری لێ ئەکەوێتەوە، شانبەشانی چەندین ئەرکی تر، لەنموونەی دەرکردنی بڕیار بۆ مەکتەب و ئۆرگان و دامودەزگاکان، هەڵسەنگاندن و پەسەندکردنی پاڵێوراوان بۆ پرۆسەکانی هەڵبژاردن و وەرگرتنی پلەو پۆستە ڕێکخراوەیی و حکومەتییەکان، لێپرسینەوەی هەڤاڵانی لێپرسراو لەناو ئۆرگانەکان و لەحکومەتدا، ئامادەکردن و پەسەندکردنی پرۆژەی بوودجەی ساڵانەی (یەکێتیی)، ئامادەکردنی ڕاپۆرتی ساڵانە؛ بۆ لێکۆڵینەوەو هەڵسەنگاندنی گشتیی (یەکێتیی)، تاکو (ئەنجوومەنی ناوەند)؛ ببێتە خاوەنی دەسەڵاتی هاوشێوەی (ئەنجوومەنی یاسادانان)، هەروەها بۆ ئەوەی ناکۆکیی و ململانێکان لەسەر دەسەڵات و بڕیاردەرکردن کەمبکاتەوە، ئەمەش خۆی لەخۆیدا بریتییە لەفراوانکردنی ناوەندی دەرکردنی بڕیارو بەشداریی پێکردنی ژمارەیەکی زۆرتر لەلێپرسراوان و کادیرانی پیشکەوتوو؛ لەپرۆسەی دەرکردنی بڕیاردا.
سەبارەت بەمەکتەبی سیاسییش؛ ئەبێ کۆنگرە مەکتەبی سیاسیی بکاتە ئۆرگانی جێبەجێکەری بریارو ئەرک و کاروبارە کارگێڕییەکانی ڕۆژانەی (یەکێتیی)و سەرپەرشتییکردنی مەکتەب و دامودەزگاکان و پەیوەندییەکان و بۆنەو چالاکییە فەرمییەکان، واتە مەکتەبی سیاسیی ببێتە پیادەکەری دەسەڵاتی جێبەجێکردن.
٤-هەڤاڵ مامجەلال؛لەپۆستی سکرتێری گشتییدا بمێنێتەوە، تا ئاساییبوونەوەی ڕەوشی تەندروستیی بەرێزی؛ گرووپێک کە لە(٣) ئەندام پێکهاتبێت؛ بەوەکالەت بەشێک لەئەرک و کاروبارە تەشریفاتییەکانی پۆستی سکرتێری گشتیی ببەن بەڕێوە، سەبارەت بەئەرک و دەسەڵاتە گرنگەکانی تری پۆستی سکرتێری گشتیی؛ وەک لەخاڵی پێشوودا ئاماژەی پێکرا؛ ئەو دەسەڵاتانە بەوەکالەت بدرێت بە(ئەنجوومەنی ناوەند)، ئەویش بەڕێژەی دەنگی (٢) لەسەر (٣)ی ئەندامان، یان بەڕێژەیەکی زیاتر؛ تاکو ئەرک و دەسەڵاتەکانی سکرتێری گشتیی، بەگوێرەی پێویست؛ بکات بەبڕیارو ڕووبەڕووی هەڤاڵانی مەکتەبی سیاسیی بکاتەوە بۆ جێبەجێکردن، گرووپە (٣) ئەندامییە باڵاکەش؛ چاودێریی و بەدواداچوون، بۆ چۆنیەتی جێبەجێکردنی سەرجەم بڕیارەکانی (ئەنجوومەنی ناوەند) بکەن؛ شایەنی باسە ئەو ئەنجوومەنە ئەبێت مووتووربە بکرێت، بەکەسانی (یەکێتییخواز، دڵسۆز، لێهاتوو، کارامە، شارەزا، پسپۆڕ، بەئەزموون، قاڵبووی خەبات، خاوەن بڕوانامەی باڵا، ژیر، خۆنەویست).
*لێپرسراوی پەیمانگەی کادیرانی (ی ن ک) لەقەڵاچوالان