هەرێمی كوردستان جاری یەكەم و یەكەمین قەیرانیش نییە رووی تێدەكات، هەمووجارێك هەوڵی ئەوە دەدرێت ئەو باوەڕە لای زۆرینە دروست بكرێت كە سەرچاوەی قەیرانەكانی هەرێمی كوردستان لە دەرەوەیە، ناوەوەی شامی شەریفە، لەكاتێكا شامیش شەریف دەرنەچوو .
ئێستاش ماشێنێكی گەورەی راگەیاندن كە بە پارەی خەڵك و نەوت بەرێوەدەچێت لەگەڵ زۆرانی تر كەزۆررینەیان بەهەمان شێوە لەسەر پارەی ئابوری بەرخۆری (نەوت) دەوڵەمەندبوون، خەریكی پیاكێشانی دهۆڵەكەن، بۆ سەرگەرمكردنی هەمووان بەوەی قەیرانەكە لێرەنییە، لەوێیە، ئەوێ سەرچاوەی هەمووقەیرانەكانمانە! .
بریارەكەی دادگای ئیتحادی لە دەرەوەی دەرهاوێشتەی ئیشكالیەتی دەوڵەتی عێراق و عقڵیەتی شۆفینزمی عەرەبی و هەژموونی دەوڵەتی مەركەزی نییە، دەمێكە ئەوەش براوەتەوە ئێمە بەزۆر لكێنراوین بە عێراق، كوردستانیان مافی خۆیانە دەوڵەتی سەربەخۆیی خۆیان هەبێت. هەرشتێكیش بۆ كوردستان بەدەست هاتبێت لێرە یان لە رۆژئاوای كوردستان لە ئەنجامی گۆڕانكاری نەبووە لە عقلیەتی شۆفینزمی دەسەڵاتدارانی عەرەبی ، بەڵكو لە ئەنجامی خەبات و تێكۆشانی خەڵكی زەحمەتكێشی كوردستان بووە، دەوڵەتانی داگیركەر كە عێراقیش یەكێكە لەوانە هەركاتێك بۆیان بكرێت شتێك ناهێڵن بەناوی ئەزموونی كوردستان و كورد و شوناسی كوردبوون .
بەڵام پرسیارە گەورەكە ئەوەیە، بۆچی (قەوارەی هەرێمی كوردستان) كە بەرئەنجامی تێكۆشانی خەڵكی كوردستانە، رۆژ لە دوای رۆژ دەگەرێتەوە (چوارگۆشەی یەكەم) لە هەموولایەكەوە ؟ .
لەماف و ئازادییەكانەوە بۆ مافە ئابوری و كۆمەڵایەتییەكان، لە شكستی ریفراندۆمەوە بۆ نەمانی هیچ ئومێدێك بە داهاتووی كوردستان، لە ئابوری بەرخۆری و نەبوونی گشەپێدان و بوژاندنەوە بۆ شكستی دەرهێنان و فرۆشتنی سامانە سروشتییەكان لەبەرژەوەندی خەڵكدا، دواجاریش كەوتنە ژێرباری قەرزی دەیان ملیار دۆلاری ناوەخۆیی و دەرەكی ؟، لەوەش خراپتر كەمینەك هەڵدەتۆقێت و دەبێتەخاوەنی هەمووشتێك لەسەر حیسابی پەراوێزخستنی زۆرینە، هەركەسێكیش لە دەرەوەی هەیمەنەی ئەو كەمینەیە بیركاتەوە و جولە بكات، تخوین دەكرێت و ژیانی دەكەوێتە مەترسییەوە .
پرسیارێكی زۆر سادە دێتەپێشەوە، ئەو كەمینە هەڵتۆقیوەی ئەمرۆ قیڕە قیڕیەتی و مزایەدەی دڵسۆزی و سەربەخۆی و رزگاری نیشتمانی دەفرۆشێتەوە، بەدرێژایی سی ساڵی تەمەنی دەسەڵاتی، هیچ هەنگاوێكی بۆ بیناكردنی بنەماكانی سەربەخۆیی ناوە، یان بینای حزب و دەسەڵاتی ئۆلیگاریشی لەسەر حیساب و لە بڕی بینای تەواوكردنی قۆناغی رزگاری نیشتمانی، كرد .
ئەگەر دۆخی ئەمرۆ لە چوارچێوەی ئەم تابلۆگەورەیەدا بخوێنینەوە تێدەگەین بۆچی دۆخەكە گەیشتووە بەئەمرۆ، بۆچی هەر رۆژەی دەكەوینە بەردەم هێرشی عێراق و توركیا و ئێران، لەوكاتانەشی هەرێم دەكەوێتە بەردەم هێرشی داگیركەران دەسەڵاتی پارتی و یەكێتی خەریكی سەركوتكردنی ئەو دەنگانەن كە رووبەڕووی داگیركەران دەبنەوە، حاڵەتێكی سەیرو سەمەرەنییە نیوەی خاكی كوردستان لەلایەن بەغداوە داگیر دەكرێت، هەزار كەس نابینیت بێتەجادە، بە بریارێكی شۆفینی دادگای ئیتحادی دەسەڵاتی هەرێمی كوردستان بچوك دەكرێتەوە بەڵام دە هاوڵاتی نابینیت بیر لە بەرەنگاری و چونە سەرجادە بكاتەوە؟ .
بۆچی زۆرینە وابیردەكاتەوە ئەوان خەریكی تاپۆكردنی كوردستانن لەسەر خۆیان و ئەگەر شتێكیش دروست بێت بۆخۆیان دروستی دەكەن نەك بۆ زۆرینە. ئەم رایە، ئەنجامی راپرسیەكی باوەر پێكراوە لە سەرەتای ئەمساڵ لەبارەی هۆكاری كۆچكردنی گەنجان كرا، لە لایەن كۆمپانیای شیكارەوە .
لە كۆتایی ئەم نوسینەدا، دیمەنی ساتەوەختی دەستگیركردن و ئیهانەكردنی هێزە ئەمنییەكانی هەولێرم بیركەوتەوە، كاتێك دووساڵ بەر لە ئەمرۆ، چوینەبەردەم بارەگای نەتەوە یەكگرتووەكان بۆ نارەزایەتی دەربرین دژ بە هێرش و داگیركاری توركیا بۆسەر خاكی هەرێمی كوردستان، چ دیمەنێك بوو ؟ .
ئەمرۆ زۆرینەی حزبی كوردی لە جێگای بینای مرۆڤ و نیشتمانێكی ئازادا، بەیەكەوە لە هاوپەیمانیەتێكی رانەگەینراودا، پرۆژەی مرۆڤی بێ ئیرادە لەناو هەرێمێكی بێ هەواری دیلكراو، جێ بەجێ دەكەن .
تۆ ببینەو بنواڕە هاورێ، دەبینیت؟ هەڵوێستی چەپ و راست چەندێك لە یەك دەچێت !، ئەم سیستەمە تاكڕەهەندە چی دروست كردووە، ئەوانەی بەناوی رێگای ئازادیدا ئازای خۆیان دۆراند، چۆن شەری كۆت و بەندكردنی ئەوانیتر دەكەن .
كاتێك هێزی بینینمان كۆی تابلۆكە دەبینێت، تێدەگەین هۆكارو سەرچاوەی كونبوونی كەشتییكە لە كوێدایە و چۆنیش بیر لە چاككردنی بكەینەوە .