هەموو شتێک لە بچوکیەوە بەرەو گەورە بون دەچێت ، تەنها یەک شت هەیە کە گەورەیە و دەبێت بچوک بکرێتەوە ئەویش کارەساتە ، کارەسات ئەوە نیە هێزێک یان پارتێک یان بزوتنەوەیەکی سیاسی لە ترۆپکی سەرکەوتنەوە بەرەو دۆڵی دۆڕان ترۆل بخوات ...؟ لێ کارەسات ئەوەیە هێزێکی سیاسی ببێتە بکوژی هیوا و خەونی هەژاران ، بێ دەرەتانانان ، مافخوراوان ، ستەملێکراوان ، بێ پشت و پەنا و بێ کەسەکان .
هیچ هێزێک لە سەرەتای دروست بونیەوە هێندەی بزوتنەوەی گۆڕان جێگای ئومێدی خەڵک نەبوو لە بەرەنگاربونەوەی گەندەڵی و دەرخەری ئەو ڕاستیانەی کە لای خەڵکی کوردستان پەنهان و شاراوە بوون . هەر ئەم هۆیەش بوو بزوتنەوەکە توانی لە یەکەمین هەڵبژاردندا نزیکەی (٥٠٠٠٠٠) دەنگ بە دەست بهێنێت . نابێت ئەوەش لە یادبکرێت زۆرینەی ئەو دەنگانە .. دەنگی خەڵکی هەژار و بێ هیواکان بوون لە دەسەڵاتدارانی ئێستای باشور . کەچی ئەم هێزە پێ بە پێ دەنگەکانی بەرەو کزبوون و کەم بوون چوو . ئەو ئەنجامەش لەم هەڵبژاردنەی ١٠/١٠ /٢٠٢١ بۆ پەرمانی عێراق بینیمان ، کاتێک نەیتوانی دەنگەکانی بگەیەنێتە (٢٥٠٠٠) دەنگ ، ئەمەش دەرئەنجامی ناپاکی بریاربەدەستان بوو لەگەڵ دەروێش ئاسا هەلپەرستەکان.
من دەمێک بوو ئەم ڕۆژگارەم دەبینی و هەڵوێستەشم وەرگرتبوو لە بارەیەوە ، هەر بۆیە دواجار (٤) ساڵ لەمەوبەر دەستم لە بەرپرسیارێتی لەم بزوتنەوەیەدا کێشایەوە .
* هێزێک سەرکرداتیەکەی لە پێناو بەرژەوەندی چەند کەسانێکی پایە و پارە پەرست گوێ لە داواکاری و ویستەکانی دڵسۆزان و هاوڵاتیان نەگرێت...!! هەر دەبێت لە گەورەییەوە بەرەو بچوکبونەوە بڕوات ...
* هێزێک دەنگی خەڵکی بکاتە ئامراز بۆ بازرگانی و خۆدەوڵەمەند کردن ...!! دەبێت بەرەو نابوتی بچێت ...
* هێزێک هێندەی تۆزقاڵێک ژیانی هەژارێک نەک تەواوی تاکەکانی کۆمەڵگاکەی پێ نەگۆڕێت ، تەنها دەوڵەمەندەکانی دەوڵەمەندتر کردبێت یان گیرفانی هەندێ چەورە و لات و پوت و نابوتی ناو سیاسەتکردنی پێ پڕ کردبێت ...!! هەر دەبێت ئەمە بەشی بێت ...
* هێزێک نەتوانێت بندیوار و گەندەڵەکانی خۆی لە ناو بزوتنەوەکەدا دوربخاتەوە و موچەکانیان ببڕێت ، ئەمە ئەنجامەکەیەتی ...
* هێزێک نەتوانێت گوێ لە خەڵکان و هەڵسوڕاوانی دڵسۆزی بگرێت و نەتوانێت بەرگری لە خوێنی ڕژاوی هاوڵاتیان بکات ...!! دەبێت خۆی لەم دۆخەدا ببینێت ...
* هێزێک لەگەڵ ڕکابەرە سەرسەختەکانیدا دەم بە قاقا و پێکەنین بێت و دڵسۆزانی لا بە دوژمن بێت ...!! دەبێت فەرامۆش بکرێت ...
* هێزێک بە ناوی چاکسازیەوە لەگەڵ حیزبە گەندەڵەکان کلک گرێدراو بێت و چاکسازی بەس لە دروشمەکانیدا بونی هەبێت و خەڵکی هیچ بەرهەمێکی لێ نەبینێبێت ...!! دەبێت چاوەڕێی ئەوەش بێت گەورەترین سزا بدرێت ...
بەرئەنجام و دوا وێستگەی ئەم بزوتنەوەیە کۆتایی پێهات و خۆری بەتینی ئومێدیش بەرەو زەردەپەڕ ڕۆیشت ...
ئینجا ببینن چۆن ئەم هێزە پەیتا پەیتا بەرەو دابەشکردن دەڕوات و تا قۆناغی پوکانەوەی یەکجارەکی ...
ببینن چۆن بەرپرسە کەڵتەکۆنە سیاسیەکان و هەرزە و چاوچنۆک و دەرفەت پەرستەکان لە ناو ئەم بزوتنەوەیەدا دەچنە ناو ئامێزی گەرمی یەکێتی و هەندێکیشیان خۆیان دەخزێننە ناو باوەشی پڕ لە سۆز و میهرەبانی پارتی ... !!!!!
ئەوەی دەربار و فریودراویشە وەدوی بەرپرسەکانیان دەکەون جا لە ناو ئەم بزوتنەوەیەدا بمێننەوە لەگەڵیان دەمێننەوە یان بگەڕێنەوە ناو هێزێکی سیاسی دی ، ئەوانەی تر لە داماو و بەشمەینەتە بە واقوڕماوی دەمێننەوە بە خەونی هاتنەدی گۆڕانکاریەوە لەسایە و سێبەری بێ ئومێدبوندا دەتاسێن و خۆیان دەدۆزننەوە ...