بەیانی ئەمڕۆ دووشەممە بەشێک لە کارمەندانی بەڕێوەبەرایەتی ڕەگەزنامەی شاری سلێمانی بۆ ڕۆژی دووەم بایکۆتکردنی دەوامیان دەستپێکرد.
پەیامنێری (سپی) لەشاری سلێمانی پێی ڕاگەیاندین" ئەمڕۆش جارێکی تر بەھۆی دواکەوتن و دابەشنەکردنی موچەکانیان و لێبرینی موچەکانیانەوە کارمەندانی بەڕێوەبەرایەتی ڕەگەزنامەی سلێمانی بە قەزا و ناحیەکان و ئیدارەی گەرمیان و راپەڕین و پارێزگای هەڵەبجە دەستیان بە بایکۆتی دەوامکردن کرد و لەبەردەم فەرمانگەکەیان گردبوونەوە".
هەروەها وتیشی" بەشێك لەو فەرمانبەرانە موچەكانیان وەرگرتووە، بەڵام كارمەندانی بەشێك لەو فەرمانگە و بەڕێوبەرایەتییانە ئامادەنین موچە بە لێبڕینەوە وەربگرن و داواكارن موچەی تەواویان بۆخەرجبكرێت".
لەماوەی ڕۆژانی ڕابردوو، وەزارەتی دارایی و ئابوریی حکومەتی هەرێمی کوردستان لەرونکردنەوەیەکدا رایگەیاند، كۆی گشتی تەمویلی پێویست بۆ موچەی یەك مانگی فەرمانبەرانی ڕەگەزنامەی هەرێمی كوردستان نزیكەی ٦ ملیار و ٢٥٠ ملیۆن دینارە، لە كۆی ئەو بڕە پارەیە مانگانە حكومەتی ناوەند نزیكەی ملیارێك و ٨٦٢ ملیۆن دیناری بۆ ٤٧٠٠ موچەخۆرانی فەرمانگە فیدراڵیەکان ناردوە کە لە ٢٥٪ مووچەی مانگێک دەکات.