بابەکر دڕەیی بەڕێوەبەری گشتی رۆشنبیری پێشووی سلێمانی، هاوسەرۆکی یەکێتی لاهور جەنگی دەڵێت" کەسایەتیەکی سیاسی لە ئاستی سەرۆکایەتی "ی ن ک" لە کەرتی گشتی و خزمەتە کۆمەڵایەتیەکان جێی دەسخۆشی و پێزانینە".
لە نوسینێکدا لە هەژماری خۆی بابەکر دڕەیی هەڵسوڕاوی دیاری بزووتنەوەی گۆڕان و بەرێوەبەری گشتی رۆشنبیری پێشووی سلێمانی لەگەڵ وەسفی هاوسەرۆکی یەکێتی دا، دەشڵێت" بەشێک لە کاربەدەستانی تر بە بەرنامەی ستراتیژی خەریکی وێرانکردنی ئابوری گشتی و کەرتی خزمەتگوزارین و دەیانەوێ کۆمەلگا بخنکێنن و بیکەنە سواڵکەری دەستی مافیاگەری و هیچ پەناگایەکی تەندروستی و مۆراڵی بۆ ئینسانی کورد نەهێڵنەوە."
دەسخۆشی ئەکەین لە بەڕێز کاک لاهور شێخ جەنگی ( هاوسەرۆکی یەکێتی نیشتمانی کوردستان) کە بە پیر داواکاری و خواستی نەخۆشەکان چالاکوانان و خەڵکی کوردستانەوە هات و لە سەردانیدا بۆ نەخۆشخانەی "هیوا" ڕایگەیاند: ناهێڵن نەخۆشخانەی هیوا بکەوێ چونکە سیمایەکی گرنگە بۆ هەرێم و هەرچوار پارچەی کوردستان.
جێی ئاماژەیە لەم بۆنەیەدا سەرنجی هاوڕێیان و خوێنەران بۆ چەن خاڵێک رابکێشین:
یەک: چەند ساڵێکە بە بەرنامەی ورد کاردەکرێت بۆ هەڵوەشاندنەوەی خزمەتە گشتیەکان و فرۆشتنیان بە کەرتی تایبەت،
دو : ئەو سیاسەتە لە لایەن تورکیا و هەنێ وڵاتی تری جیهانەوە پشتیوانی لێدەکرێ و لە بناغەدا ئامانجی کەڵەکەکردنی سەرمایەیە لە دەستی چەن تاقمێکی دەسەلاتدارو پەراوێزەکانیان، و ئەوەیش بە دروستکردنی شۆکی ئابوری و سیاسی و سایکۆلۆژی، سەرەنجام وێرانکردنی بناخە ئەخلاقی و روحیەکانی کۆمەڵگا بە مەبەستی تەسلیمبون و ملکەچپێکردن و خەریکبونی ئۆپۆزیسێۆن و خەلک بە داکۆکی و شەری ژیان نەک هەولدان بۆ پێشکەوتن و خۆشگوزەرانی...
سێ: ئەم شێوازە لە ئاستی جیهانیدا لایەنگرو بیرمەندی تایبەت بەخۆی هەبون و هەن. لایەنگرانیان پێیان وایە گەر بیابانێک بدەیتە دەست "دەوڵەت" تا بەڕێوەی ببات، دوای ساڵێک پێتدەڵێن بیابان لمی تیا نەماوە! بۆیە ئەو بیرمەندانە ( لەوانەش میلتۆن فریدمان - قوتابخانەی شیکاگۆ) بەتەنگ سەرەنجامی داڕوخانی ئەخلاق و کەوتنەسواڵی کۆمەڵگاوە نین و پێیان وایە سیستمی کاپیتالیزمی بازاڕ تەنها رێچکەیە بۆ ئیدارەدانی کۆمەڵگا.
چوار : ئەو دیدگایەی لە کوردستاندا ئیدارەی وڵاتی پێدەدرێ ( بەدەر لە خواستی کاربەدەستان یان بە خواستی ئەوان) دیدگایەکی سەرمایەداری دڕندانەیە کە ئەمریکا خۆیشی لەسەری ناروات و گفتوگۆی ئێجگار توند لەسەری بەردەوامە و لە گشتدا تێزێکی شکستخواردوە...
ئەو شێوازەی هەرێمی کوردستان کە کەڵبەی سەرمایەدارەکانی حزب و دەوڵەتی بە سەرمایەدارەکانی بازارەوە لەحیم و ئاوێتەکردوە، چەشنێک لە کەسابەت و بازاری هێناوەتەئاراوە کە جگە لە سەرمایەداری مافیایی یاخود ئەوەی پێی دەوترێ" کۆماری مافیا" ناکرێ ناوێکی بۆ دەستنیشان بکرێ.
پێنج : بەرەنجام و ئاسەواری کۆماری مافیایی لە هەر شوێنێ بێت بریتی ئەبێت لە هەلتۆقینی ملیۆنەرەکان جا بە فشاری دۆلار بێت یان کلاشینکۆف، هەراجکردنی ئەخلاقی کۆمەلگاو دارمانی نەریتە جوانەکان و بەبازارکردنی ئافرەتان و بلاوبونەوەی لەشفرۆشی و جەستەفرۆشی، لێدان لە خزمەتە گشتیەکانی وەک ئاو و کارەباو نەخۆشخانەکان و فرۆشتنیان بە کەرتی بازاڕ و گرێدانەوەیان بە نێوەندە بڕیاردەرەکانی ناوچەکەو جیهان، دروستکردنی قەیرانی سیاسی و ئابوری و کۆمەلایەتی درێژماوەو کورتماوەو سەرقالکردنی "هەموان" بە پاراستی ئەوەی هەیەنەو دورخستنەوەیان لە هەبونی خەونی خۆشبەختی و پێشکەوتن و ژیانی ئنسانی شایستە..
شەش : ئەم شێوازە کاپیتالیستیە مافیاییە لە ولاتە سەرمایەداریە کلاسیکەکانی وەک بریتانیاو ئەلمان و ئەسکەندینافی و زۆر وڵاتی دیکە بە تەواوی ڕەتکراوەتەوەو، پێگەو قورسایی دەولەت بۆ پاراستنی ئابوری و بەهاکانی کۆمەلگا هێشتاش لە شوێنی خۆیەتی..
ئەرکێکی قورسە لە هەرێمی کوردستاندا داکۆکی لە ئابوریەکی تێکەڵی دەولەتی - تایبەتی بکرێت لە کاتێکا بەشێک لە دەسەلاتدارە پلە یەکەکانی وڵات سالەهایە بە کۆمەکی تورکیاو ولاتانی تر خەریکی تەپاندن و روخاندنی ئەو بناخەیەن کە زیاتر لە حەفتا هەشتا سال عیراق لەسەری رۆێشتبو.
لەم پێودانگەدا داکۆکی کەسایەتیەکی سیاسی لە ئاستی سەرۆکایەتی "ی ن ک" لە کەرتی گشتی و خزمەتە کۆمەڵایەتیەکان جێی دەسخۆشی و پێزانینە بە هەبونی ئەو بەرچاورونیەی کە بەشێک لە کاربەدەستانی تر بە بەرنامەی ستراتیژی خەریکی وێرانکردنی ئابوری گشتی و کەرتی خزمەتگوزارین و دەیانەوێ کۆمەلگا بخنکێنن و بیکەنە سواڵکەری دەستی مافیاگەری و هیچ پەناگایەکی تەندروستی و مۆراڵی بۆ ئینسانی کورد نەهێڵنەوە.