وەزیری تەندروستیی حكوومه‌تی هەرێمی کوردستان ڕای دەگەیەنێت دۆخی کوردستان لە تووشبوون بە ڤایرۆسی کۆرۆنا لە ئێستادا لە هێڵی سوورداین و مەترسیدارە.
لە ڕێوڕه‌سمێكدا بە ئامادەبوونی د. سامان به‌رزنجی، وەزیری تەندروستیی هەرێمی کوردستان و ئومێد خۆشناو، پارێزگاری هەولێر، ئەمڕۆ دوو شەممە کلینیکی ڕاوێژکاریی تووشبوانی ڤایرۆسی کۆرۆنا کرایه‌وە، لەو مەراسیمەدا د. سامان بەرزنجی رایگەیاند " ماوەی چەند هەفتەیەکە بەردەوام ژمارەی تووشبوون بە ڤایرۆسی کۆرۆنا و مردن بەهۆی ئەو ڤایرۆسە لە هەڵکشاندایە".
وەزیری تەندروستی وتیشی " لە ئێستادا ڕاپۆرتی پەتازانیی وەزارەتی تەندروستی کوردستان لە ئامادەکاریدایە و ئەمڕۆ تەواو دەبێـت و ئاڕاستەی ئەنجوومەنی وەزیران و لیژنەی باڵای بەرەنگاربوونەوەی ڤایرۆسی کۆرۆنا دەکرێت، بەپێی ئەو ڕاپۆرتە دۆخی کوردستان گەیشتووه‌تە هێڵی سوور و لە مەترسیداین".
دەربارەی رێگا چارە و دەرچوون لەم قۆناغە مەترسیدارە، د. سامان بەرزنجی وتی" باشترین چارەسەریش بۆ ئەو دۆخە خۆپارێزی و کارکردنی بەردەوامی سیستمی تەندروستیییە کە ئێستا هەموو دەزگاکانمان لە ئەرکدان".
هەفتەی پێشوو هەرێمی کوردستان لە بڵاوبوونەوەی کۆرۆنادا لە دۆخی پرتەقاڵیدا بوو، بەڵام لەگەڵ پەرەسەندنی ئەو دۆخە چووە نێو قۆناغی سوورەوە.